CEBU, Philippines - Pormal nga gilusad sa Run For Sight Foundation ang ilang charity run nga giulohan og "Run for Ondoy" karong Oktubre 18 diha sa Cebu Doctors' University (CDU) grounds.
Ang matigom sa maong charity run ihinabang ngadto sa mga nabiktima sa bagyong "Ondoy."
"As Filipinos, we are all bothered by the images of our fellow brothers with what is happening because of typhoon Ondoy and what a better way to help them by running," matud ni Dr. Yong Larrazabal atol sa press conference kagahapon diha sa Cebu Doctors' Hospital board room.
Ang "Run for Ondoy" adunay duha ka kategoriya -- 10K ug 5K Open.
Ang registration fee nagkantidad og P300 libre na ang singlet ug race number.
Sa iyang bahin, ang igsuon ni Yong nga si Dr. Philip Larrazabal mikompirmar nga lakip sa mosalmot mao ang ilang tinun-an sa Cebu Doctors' University.
Naglaum si Yong nga sama sa ilang gilusad niadtong tuig 2007 nga “Run for Guimaras”, magmalampuson gihapon ang maong lumba ug makatigom sila og igong salapi.
Gawas sa salapi, ang kapikas ni Yong nga si Donna Cruz-Larrazabal mihangyo sa mga partisipante sa pagdala og mga delata nga pagkaon ug mga bisti aron ilakip nila sa pagpadala ngadto sa Manila.
Mihatag usab sa ilang suporta sa maong lumba ang ABS-CBN, 2Big, Run for Sight Foundation ug Sports and Fitness Enthusiast nga gipangulohan ni Atty. Jes Labrador.
Alang niadtong interesadong mosalmot sa “Run for Ondoy" mahimong motawag sa CDU Center for Sight sa numero 256-2020 o 255-5555 o text sa numero 0923-3899071. (BANATNEWS)