Requilme mihakot duha ka titulo sa 4th leg OZR Grand Prix

CEBU, Philippines - Migawas nga labing bulahan si Lyndon Requilme sa tanang mga riders nga nidaog sa fourth leg sa OZ Racing Grand Prix Series 2009 nga giulohan og 6th Danao City Mayor’s Cup niadtong Domingo didto sa Danao City Sports and Civic Center grounds.

Si Requilme milangkat og duha ka championship trophies pinaagi sa premiere expert ug novice open. Iyang gipukan silang Arnel Fajardo ug Bobbie Mencias sa expert category, samtang sila si Niño Surban ug Fajardo ni-okupar sa mosunod nga duha ka luna sa novice open.

Sa laing bahin, si Keken Cabahug misakiyo sab og duha ka titulo pinaagi sa pagpanghawod sa beginners superstock 110cc. ug 125cc. categories.

Iyang napuhalan ang abilidad nilang Mark Capoy ug Moises Muñoz alang sa kinatas-ang dapit sa 110cc., samtang sila si Muñoz ug Jeslouie Vega nalandig sa ikaduha ug ikatulo nga dapit sa 125cc.

Hinuon, si Capoy maoy nanghawod sa automatic open. Si Kenneth Ouano nalandig sa ikaduha. Mikompleto sa top five mao sila si Nelson Mayol, Gilbert Miro ug Insik Flores.

Sa first timer division, si Jonardo Romero maoy nahimo nga labing kusog, gisundan nilang Reymarx Terona ug Erwin Albaracin nga mi-okupar sa ikaduha ug ikatulo nga dapit. Sila si Franz Lloyd Galan ug Rely Brendo maoy mikompleto sa top five winners.

Wala sab magpabitin si Ricky Banzon, kinsa nidominar sa Danao Locals division. Si Harold Roble mipahiluna sa ikaduha, gisundan nilang Glenn de la Rama, Nanoy Cuervo ug John Vincent Capoy.

Ang maong torneyo gipasiugdahan sa OZ Racing Corp. pinaagi sa ilang presidente Zandro Fajardo uban sa pagtambayayong sa Danao City Sports Commission (DCSC) pinaagi sa ilang chairman ug city councilor Oscar ‘Boying’ Rodriguez Jr.   (BANATNEWS)