UC batok DBTC

CEBU, Philippines - Armado og 'twice-to-beat' advantage, ang top seed University of Cebu (UC) Webmasters tinguha nga moabante dayon sa semis sa dihang ilang harungon ang no. 8 seed Don Bosco Technology Center (DBTC) Greywolves sa main game sa pagpadayon sa 9th Cebu Schools Athletic Foundation Inc. (CESAFI) basketball event quarterfinal round diha sa USC gym.

Sayo karong hapon, ang secondary defending champion UC Junior Webmasters makigsangka sab batok sa DBTC Junior Greywolves ug tinguhang dili magpapilde karong adlawa human sa ilang 8-0 sweep sa classification round.

Ang Webmasters, kinsa mitapos isip top qualifier sa labing unang higayon ning siyam na ka tuig nga CESAFI uban ang 6-1 win-loss record, milubong sa Greywolves sa una nilang panagbagat sa iskor nga 120-85, apan nag-agi una og sikit kaayong sangka sa tibuok first half.

Ang Webmasters nagtabla unta sa second-ranked University of the Visayas (UV) Green Lancers, apan tungod sa ilang 75-73 nga kadaugan batok sa naulahi niadtong Agosto 2, sila maoy nahimong no. 1 qualifier.

Ang Junior Webmasters mipakita sab sa ilang kabangis batok sa Junior Greywolves pinaagi sa pag-iskor og 50 puntos nga kadaugan sa iskor, 109-59 ug ang resulta sa duwa karong gabii dili na angay ikapangutana.

Sa higayon nga adunay repeat ang UC squads batok sa DBTC, sila maoy unang maka-abante sa semifinals diin mag-anam na og kataas ang intensity sa duwa.

Sama sa naandan, ang 6-foot-11 nga si June Mar Fajardo maoy numero uno nga bantayan sa Greywolves. Si Mar Fajardo magbahas sa painted area, samtang si Moncrief Rogado maoy tirador sa gawas ilabi na sa three-point territory. Sila si Janssen Abella, Arvin Kim Gomez ug Kelvin Juliane maoy nakadugang og daghang bala alang sa armory sa Webmasters nga naglakip nilang Rommel Luceño, Robinson Mohamad, Kevin Quilantang ug mga rookies Mark Tano, V-Franz Bernil ug Keith Erwin Cayanong.

Ang Greywolves magmantenir nilang Celso Colegado Jr., Alain delos Santos, Joseph Villaver, Jefford Aldave ug Jayson Cabrilles.

Sa gubat sa secondary division, sila si Jerei Marlon Pingoy, Gerald Ampoon, Alfred Codilla ug Alvin Labolabo Jr., mao lamang ang pipila sa mga sinaligan sa UC nga gipaabot nga mohatag og labad sa ulo sa Junior Greywolves.

Samtang sa habig sa Junior Greywolves magsalig kini nilang Kyle Esbra, Chris Daryl Yap, William Kristoffer Alburo, Fane Empenio, Rob Lowe Balorio ug sa managsuong   Lourence ug John Eleazar Ruiz.    (BANATNEWS)