Pacquiao maoy isunod ni Floyd?

CEBU, Philippines - Gisumpo sa Southwestern University (SWU) Cobras ang University of Cebu (UC) Webmasters aron dili kini makakulit ug elimination round sweep pinaagi sa paglubong niini sa iskor, 89-65 kaniadtong Sabado sa nagpadayong Cebu Schools Athletic Foundation, Inc. (CESAFI) didto sa Cebu Coliseum.

Gawas nga wala mag-igo ang Webmasters sa gawas ug wala kaayo kahuygo ang 6-11 nga sentro nga si June Mar Fajardo, wala sab makaduwa ang tulo ka pambato sa Webmasters nga sila si Moncrief Rogado, Janssen Abella ug Kevin Quilantang.

Matod pa sa ilang coaching staff nga si Rogado nagpa-admit sa hospital kay naglain ang lawas ug sila si Abella ug Quilantang kinsa naglingkod sa bench nga nag-uniporme, gisilotan ug gibangko tungod kay wala kini magtinarung o mopakita’g kaseryoso atol sa ilang praktis sa miaging adlaw.

Ang resulta? Gitudloan sa Cobras og basketball ang Webmasters ug ubos sa liderato ni Eliud Poligrates, walay nahimo ang depensa sa UC tungod kay si Poligrates yano ra kaayong nanamastamas kanila pinaagi sa iyang 29 puntos.

Nagsunod kaniya si Rene Pacquiao kinsa mipakita’g abilidad batok kang Fajardo ug mi-iskor og 20 puntos samtang mihakot si Jefferson Pria og 14 puntos.

Tungod sa pakyas nga kampanya sa UC, bugtong ang Lancers ra maoy pabiling collegiate team sa CESAFI nga nakahimo’g sweep og wala nay lain.

Gikontrolar sa Cobras ang duwa gikan sa sinugdanan hangtod na sa kataposan ug igo lang gipasikit ang Webmasters ngadto sa 16 puntos, 68-52 human sa third period.

Ang Cobras mitapos sa classification round isip no. 3 qualifier sa ilang 4-3 nga baraha luyo sa UC ug UV samtang ang University of San Carlos (USC) Warriors maoy naka-angkon sa no. 4 nga luna.

Bisan sa ilang 6-1 nga baraha ug nagtabla sa UV, ang Webmasters gihapon ang no. 1 qualifier tungod sa ilang 75-73 nga kadaogan batok sa Lancers kaniadtong Agosto 2.

Si Fajardo maoy nangu sa opensa sa Webmasters sa iyang 19 puntos samtang parehong midugang og 10 puntos sila si Arvin Kim Gomez og ang rookie nga si Reynan Capoy.

Ang ubang fans sa CESAFI nagduda hinuon nga nagpapilde og tuyo ang Webmasters hinungdan nga nakabuhi sila’g sakit nga pulong nga gikutlo sa Banat Sports “Klaro kaayo uy kay wala gyud sila maninguha. Maayo unta og gaba-an aron dili na gyud kadaog ug usab,” matod pa sa usa ka CESAFI fan.

Alang sa Cobras, mahimong usa lang kadto ka kumplemento apa mas maayong taposon ang classification round ug daog inay sa pilde.

Puntos matag usa:

SWU (Srs.) 89— Poligrates 29, Pacquiao 20, Pria 14, Armecin 6, Litorja 6, Jalandoni 4, Diango 2, Gallarde 2, Ompad 2, Ortuyo 2, Palileo 2

UC (Srs.) 65— Fajardo 19, Gomez 10, Capoy 10, Luceño 9, Tano 7, Bernil 3, Cabrera 2, Cueva 2 Halftime 41-27. – BANAT NEWS