CEBU, Philippines - Mo-ulbo na ang 1st Mayor Osmeña International Slo-Pitch Softball Tournament nga sugdan sa alas-8:30 diha sa Sugbu grounds sa South Road Properties (SRP).
Si Perry McNeely, team manager sa bisitang koponan Pattaya Sports Club, nagkanayon nga makalingaw ang maong torneyo tungod kay duwaon lang kini sulod sa 45 minutos.
Gawas sa Pattaya Sports Club sa Thailand, moapil sab ang Salazar College of Science and Institute of Technology (SCSIT) ni Dionisio Bacarisas, Energo Energy Drinks ni Leo Caballero, Lapu-Lapu City team Locan nila ni Jonel ug Erwin Ymbong ug Halbstarkein.
Matud pa ni McNeely nga tumong sa maong torneyo ang pag-promote sa Sugbu ngadto sa mga langyaw. Sumala pa ni McNeely nga nakita niya ang Sugbu nga usa ka dapit nga haom alang sa sports tourism dinhi sa nasud.
Alang sa mga gustong motan-aw sa torneyo, adunay libreng shuttle ride nga manukad diha sa Cebu City Hall ngadto sa binyu.
Ang maong torneyo gipasiugdahan sa Cebu City Government uban sa suporta sa Cherry QQ Cars, Badgers Sports Club, Pattaya Sports Club ug Vienna Kaffehaus. – BANAT NEWS