7-0 sweep tuyo sa UC

CEBU, Philippines - Nangahas ang walay pilde nga University of Cebu (UC) Webmasters nga mokulit og talagsaong 7-0 sweep dihang ilang sangkaon ang Southwestern University (SWU) Cobras sa 9th Cebu Schools Athletic Foundation Inc. (CESAFI) basketball season karong gabii diha sa Cebu Coliseum.

Modaog o mapilde dili na matandog ang Webmasters sa ilang nahimutangan isip no. 1 qualifier ug gani maoy ilang gusto nga papahuwayon ang ilang mga starting unit ug hatagan og taas-taas nga playing time ang mga second stringers.

Bisan si UC team manager Atty. Baldomero C. Estenzo dili seryoso alang sa makasaysayanong sweep kay dili na kini makapausab sa ilang puwesto ug anaa ra sa ilang mga players kun unsaon pagpakita sa ilang abilidad atol sa 40 minutos nga kumbati batok sa Cobras.

"Win or lose, it doesn’t matter at all but we have to give our second stringers enough time to play so that they can be ready during the quarterfinals," matud pa ni Estenzo.

Ang Webmasters buot mobawos sa ilang kapildihan sa Cobras sa miaging CESAFI Partner’s Cup finals niadtong Marso diha gihapon sa Cebu Coliseum. Apan kining butanga nilabay na ug niadtong tungora uban pa kanila sila si Eric Zanoria ug Richard Gianchand.

Lahi na karon ang Webmasters. Mas andam na kini nga makigsambunot sa Cobras gawas pa, nag-umento na ang duwa sa ilang mga rookies ug taas kaayo ang ilang espiritu tungod sa ilang hapsay nga 6-0 baraha.

Sa higayon nga modaog ang Webmasters alang sa 7-0 sweep, sila maoy ikaduhang team sunod sa University of the Visayas (UV) Green Lancers.

Ang Green Lancers, kinsa mikompleto sa qualifying phase uban ang 6-1 nga baraha og opisyal nga milingkod sa ikaduhang dapit niadtong Huwebes human nila paniting buhi ang University of San Jose-Recoletos (USJ-R) Jaguars, 95-55.

Gani, atol sa halftime nahibaw-an na ang dagan sa duwa dihang nilabaw og makalumos nga lubong ang Lancers, 49-24.

Si Elmer Mykiel Cabahug maoy nangulo sa Lancers, kinsa mibahug og 18 puntos, samtang ang rookie nga si Johann Quintana miposte og season-high 12 puntos.

Ang 6-foot-11 nga si Gregory Slaughter miamot og 11 puntos, apan gitawgan og technical foul atol sa third period dihang iyang gikapyotan ang ring human sa iyang two-handed monster slam.

Si Edwin Bibera lang ang bugtong Jaguars nga nakahimo’g double figures pinaagi sa iyang 13 puntos ug ilang gitapos ang elimination bitbit ang 4-3 nga baraha.

Puntos Matag Usa

UV (95) - Cabahug 18, Quintana 12, Slaughter 11, Diputado 9, Mercader 7, Lao 7, Silva 6, Lasala 5, Dennison 5, Cincoflores 5, Olivares 4, Manigque 4, Señeres 2

USJ-R (55) - Bibera 13, Suliman 8, Villaver 7, Nudalo 6, Amores 5, Lapiz 4, Alquizola 3, Pateño 2, Senining 2, Dela Rama 1. – BANAT NEWS