CEBU, Philippines - Ang LLBA cagers mimakmak sa CLSI, 72-62 aron pag-abante sa semifinals sa 2nd Gilbert Purcia Cup 2009 niadtong Domingo diha sa Guadalupe Sports Complex.
Bisan og wala makaduwa ang duha ka sinaligan ni coach Billy Nadado nga sila si Boboy Ciriaco ug Mario Bancale tungod sa injuries, ang LLBA nakahimo gihapon sa pag-angkon og lingkoranan sa semis ubos sa pagtambayayong nilang Pompie Ngujo, Dandan Ramos ug Rey Amodia nga pulos midiskarga og double figures.
Si Ngujo mirehistro og 12 puntos, samtang sila si Ramos ug Amodia mitali og 10 puntos matag usa alang sa LLBA, kinsa makighamag sa Bajao alang sa bakanteng lingkoranan sa finals karong Domingo sa alas-9:30 sa buntag human sa engkuwentro sa pasiunang duwa tali sa Lite Shipping ug Carga nga gikatakda sa alas-8:30 sa buntag.
Ang mga mananaog maoy magsangka sa tinaktakay nga kampiyonato, samtang ang pilderong mga koponan mag-ilog sa ikatulong dapit.
Daku ang pagtuo ni coach Nadado nga makasulod
sila sa finals ilabi na nga mobalik na'g duwa sila si Ciriaco ug Bancale nga mopalig-on og maayo sa opensa sa LLBA.
Mipakita sab og maayong labok sa LLBA sila si Cacay Verzosa ug Neil Pepito nga pulos mipupo og nuybe puntos matag usa. Sila si Armand Lamoste ug Ram Gomez mitimbre og siyete puntos matag usa, samtang sila si Riel Tampus ug Ernie Giganto parehong mitimang og singko puntos alang sa LLBA.
Ang LLBA gipaluyohan sab sa John Videoke ni Ely Gomoz, i3R Motor Parts ni Dandan Ramos ug sa Rollway ni Rolly dela Peza.
Ang pilderong CLSI gipangulohan ni Badana, kinsa miburak og game-high 23 puntos, apan wala kini makakuha og maayong suporta gikan sa iyang kaubanan.
Sa laing bahin, ang Carga nakasulod sab sa semis dihang ilang gilubong ang Hyde Sales sa iskor nga 78-53.
Puntos Matag Usa
LLBA/ROLLWAY (74) - Ngujo 12, Ramos 10, Amodia 10, Versoza 9, Pepito 9, Lamoste 7, Gomez 7, Tampus 5, Giganto 5
CLSI (62) - Badana 23, Alegado 12, Alicante 7, Muelle 6, E. Oteda 5, B. Oteda 3, Biado 2, Alegado 2, Candle 2. – BANAT NEWS