Cebu Niños manulong sa Quezon

CEBU, Philippines - Sugdan karon ang Smart Liga Pilipinas Conference II Quezon Province leg uban ang tulo ka top finishers sa miaging conference ug usa ka lab-as pa nga team gikan sa North nga magtigi didto sa Quezon Convention Center.

Andam na ang host Quezon Red Oilers ni Gov. Raffy Nantes nga mosungasong sa mga hagit gikan sa duha ka bisitang leg winner M. Lhuillier Kwarta Padala-Cebu Niños, ang defending National Champion Misamis Oriental Meteors ug ang bag-o lang nadawat nga "guest" team EBK Apayao Rapids.

Ang Rapids sa Kalinga Apayao, nga nagtinguha nga mamahimong regular nga sakop sa Liga Pilipinas maoy mihulip sa dapit nga gibakantihan sa Toyota Bacolod Turbos.

Ang Niños ni Michel Lhuillier ug coach Yayoy Alcoseba naglaraw nga mokulit sa ilang ikawalo nga daog niini nga conference.

Sila si Bruce Dacia ug Woodrow Enriquez, ang MVPs sa Cebu ug Misamis Oriental Leg, maoy mangulo sa opensiba sa Niños, uban sa suporta nila ni Stephen Padilla, Ian Saladaga, Ariel Mepana, Frank Nailon, Mark Ababon, Marlon Basco, Abby Santos ug Jan Malinao. - Yoyo R. Abayan (BANAT NEWS)