Yong Larrazabal nilampos

CEBU, Philippines - Ang inilang running doctor dinhi sa Cebu nga si Potenciano 'Yong' Larrazabal III misakmit na usab og laing kalamposan human niya mahuman ang makutas nga Experian Robinhood Festival of Running 2009 Marathon niadtong miaging adlaw didto sa Nottingham, United Kingdom.

Si Larrazabal mitapos sa lumba sulod sa upat ka oras 21 minutos ug 30 segundos nga mihatod kaniya ngadto sa 835th place sulod sa 1,325 ka mga finishers sa men and women divisions

Hinuon, si Larrazabal nagkanayon nga wala niya hatagi'g gibug-aton ang iyang ranking apan ang importante alang kaniya mao ang pagtapos sa lumba.

Mapasalamaton usab ang eye-doctor nga si Larrazabal sa dakung suporta nga iyang nakuha gikan sa iyang pamilya ug kahigalaan nga maoy naghatag kaniya og igong kusog aron makasugakod sa maong marathon.

Nasayran, si Larrazabal uban ang iyang running partner nga si Dr. Peter Mancao ug uban pa nga mga dekalibreng runners dinhi sa Sugbu misalmot usab sa Big Sur International Marathon didto sa Monterey, California.

Uban ni Larrazabal nga nidagan mao ang iyang asawa nga si Donna Cruz-Larrazabal.

Gawas sa marathon didto sa UK, laing nakab-ot nga kalampusan ni Larrazabal mao ang Milo Marathon, Pasig International Marathon ug New York Marathon niadtong 2007, Hong Kong Marathon ug Chicago Marathon niadtong miaging tuig. - Lemuel P. Maglinte (BANAT NEWS)