UC pabiling naghari sa 2009 Milo Little Olympics-Visayas Finals

CEBU, Philippines - Pabilin gihapon nga naghari ang University of Cebu (UC) bisan pa sa seryosong hulga human nila nadaog ang overall championship sa secondary division sa 14th Milo Little Olympics-Visayas Finals niadtong Domingo diha sa Cebu City Sports Center (CCSC).

Samtang misulbong og maayo ang UC, puwerte sab nga pagkahagba ang University of the Visayas (UV), gawas nga gipalagpot sila sa Sacred Heart School-Jesuit (SHS-J), nalabay sab kini ngadto sa ika-10 nga dapit sa elementary division.

Namunga ang mga paningkamot sa mga batos sa UC bisan og gihulga kini sa ilang ika-13 ka tuig sa pagsungasong sa mga hagit gikan sa mga nagkalain-laing koponan ug napanalipdan nila ang ilang korona pinaagi sa pagpupo og 184 puntos.

Ang Abellana National School (ANS) misuway sa pagtangtang sa UC sa kinatumyang dapit, apan nagkasayop-sayop sila sa finals sa boys volleyball ug chess events.

Gitapos sa UC ang ilang kampanya uban ang 1-2 nga baraha sa chess. Ang ilang boys squad maoy kampiyon bitbit ang 14.0 puntos, usa lang ka punto ang labaw batok sa SHS-J. Ang ANS mipahiluna sa ikatulo nga adunay 12.0 puntos.

Sa habig sa mga babaye, ang UC pawnpushers mi-okupar sa ikaduha sunod sa ANS, samtang ang Cebu Institute of Technology (CIT) nalandig sa ikatulo.

Ang UC miharos sa tanang titulo sa badminton boys and girls division.

Bisan og walay mga entrante sa gymnastics, football, tennis, scrabble, boys volleyball ug sepak takraw, ang UC nagmalampuson gihapon, gawas nga nidominar sa chess ug badminton, mihakot sab kini og makahangak nga 60 puntos sa athletics, 30 puntos matag usa sa swimming ug table tennis ug siyam sa taekwondo.

Mao kini ang labing unang higayon nga ang organizers sa athletic meet nga gipaluyohan sa Nestle Philippines misagop og points system aron pag-ila sa top performing schools ug garbo sa UC nga maoy unang milihi.

Sa kinatibuk-an, ang UC miposte og komportable nga kadaugan batok sa ANS nga mikutlo og 148.5 puntos, samtang ang kampiyon kaniadto nga University of San Carlos (USC) nalabay sa ikatulo nga adunay 114.35 puntos.

Sa elementary division, ang SHS-J maoy misakmit sa korona human sa ilang tim-os nga performance sa athletics, football, gymnastics ug taekwondo aron pagposte og 58.25 puntos.

Ang Basak Community Elementary School mitapos sa ikaduha uban ang 49 puntos, samtang ang Pardo Elementary School nalandig sa ikatulo sa ilang 47.16 puntos.

 (Yoyo R. Abayan)   (BANAT NEWS)