Super Idols milubong sa Pañeros sa 3rd IBP cagefest

CEBU, Philippines - Gilubong sa Super Idols nilang coaches Atty. Bong Pepito ug Atty. Erwin Heyrosa nga maoy silot ngadto sa   Pañeros ni Jun Felicitas, 73-57 atol sa ilang engkuwentro sa 3rd season sa Integrated Bar of the Philippines (IBP) 2009 basketball tournament niadtong Sabado diha sa Capitol Parish gym sa dalan Escario, ning dakbayan.

Bisan pa og wala makaduwa ang ilang playmaker nga si Ramsey Quijano, kansang amahan namatay niadtong miaging adlaw, ang Super Idols nakahigayon gihapon pagdominar sa kinatibuk-ang duwa.

Naglabaw sila og 10 puntos, 51-41 paghuman sa third period ug walay hunong nga namunit og puntos hangtod nga naangkon ang 16 puntos nga kadaugan.

Ang power forward nga si Benjo Santiago ug top center Fermin Pepito maoy nangu sa Super Idols nga nagkumboya og 36 puntos. Sila si Flor Yosores ug Chris Abayon miamot og 10 puntos matag usa.

Ang Pañeros gipangulohan ni Barry Busi, kinsa mibahog og 16 puntos.

Sa laing duwa, ang Pecandela Law Firm midaog sab batok sa Casino Rubbing Alcohol sa iskor nga 68-65.

 Si Tommy Yu mitusak og krusyal nga three-point shot nga nakabuak sa panagtabla, 63-all ug naghatag sa Pecandela og tres puntos nga labaw, 66-63 sa nahabiling 18 segundos sa duwa. Mibawos ang Casino kortesiya ni William Mañus sa Casino, apan gitubag sab kini ni Wilson Tagsip aron pagselyado sa kadaugan.

Sila si Yu ug Jessie Capoy maoy nangulo sa Pecandela nga parehong mipupo og 12 puntos, samtang sila si Russ Mark Gamallo ug Tagsip nagkumboya og 21 puntos.

Si Richard Bauzon mirehistro og game-high 23 puntos alang sa pilderong Casino.

PUNTOS MATAG USA

Unang duwa:

Super Idols (73) - B. Santiago 19, F. Pepito 17, Abayon 10, Yosores 10,

Daluz 8, Fernandez 3,

Ibones 2, M. Santiago 2, Malig-on 2

Pañeros (57) - Busi 16, Felicitas 11, Aliño 10, Ruaya 9, Calipayan 7, Pepito 2, Cabilte 2

Ikaduhang duwa:

Pecandela (68) - Capoy 12, Yu 12, Gamallo 11, Tagsip 10, Malazarte 8, Tenefrancia 8, Pepito 5, Gealon 2

Casino (65) - Bauzon 23, Mañus 14, Bragat 10, Dumon 8, Limalima 6, Tambago 2, Amores 2   (Gabby G. Malagar)    (BANAT NEWS)