CEBU, Philippines - Nakalingkawas pinaagi sa usa ka split decision ang ALA Boy nga si Donnie "Ahas" Nietes aron madepensaan pag-usab ang iyang WBO minimumweight title batok sa Mehikanong si Manuel Vargas sa ilang sangka kagahapon didto sa El Palenque dela Ferias sa Nayarit,Mexico City.Atubangan sa libuan ka mga dumadapig ni Vargas, gipakita ni Nietes ang iyang hugot nga tinguha aron panalipdan ang iyang titulo dihang nipatigbabaw siya sa pinuntosay batok sa Mehikano sa iskor nga 116-110 ug 118-110, samtang usa sa tulo ka mga hurado ang nihatag og 116-110 ngadto ni Vargas.
Si Nietes kinsa nitagna nang daan nga mo-abut ngadto sa 12 ka hut-ong ang ilang away ni Vargas, nisukol og sinukliay sa kumo batok sa Mexican challenger kinsa nipamatuod usab sa iyang abilidad nga mupasulod og mga makusug nga body shot.
Sa second round, naglisud ang Pinoy champion tungod sa gipakitang ka-agresibo ni Vargas,apan namawi siya sa naghinapos nga mga round human siya nipatama og mga nindot nga kombinasyon aron makumbinsi ang mga hurado nga ihatag kaniya ang daog.
Ang lumad nga taga-Bacolod citynga si Nietes kinsa naglamapuson sa ikatulo niyang title defense lakip karon sa lista sa mga Pinoy world champion nga gilangkuban nila ni WBA interim super flyweight king Nonito Donaire, Jr., IBF light flyweight titlist Brian Viloria, WBO super flyweight champ Marvin Sonsona ug IBO light welterweight champion Manny Pacquiao.
Hinuon, kung naglisud si Nietes pagpapha ni Vargas, dali ra usab nga mikulit og daog ang laing ALA fighter nga si Z "The Dream" Gorres dihang iyang gipahunong sa round six ang laing Mehikano ug kanhi world bantamweight champion nga si Cruz Carbajal.
Bisan paman sa dakung gisi sa iyang kilay nipatigbabaw gihapon si Gorres sa sinukliay og kumo batok ni Carbajal ug sa dayun sugud sa round six wala damhang gihunong ni referee Alberto Ramos ang away human nakahiagum og injury sa iyang walang kamot si Carbajal nga maoy nakapaaghat sa kampo sa Mehikano nga moatras sa away. - BANAT NEWS