Titulo itataya ni Nietes vs Vargas

MANILA, Philippines - Muling itataya ni Donnie “Ahas” Nietes ang kanyang hawak na world minimumweight title sa labas ng Pilipinas.

Nakatakdang sagupain ngayon ni Nietes si Mexican challenger Manuel “Chango” Vargas para sa kanyang World Boxing Organization (WBO) minimumweight belt sa 4,000-capacity na El Palenque de la Feria sa Nayarit, Mexico.

“Hindi ako natatakot sa kanya kahit na sa bansa niya gagawin ang laban namin,” ani Nietes kay Vargas, ang kasalukuyang WBO interim minimumweight titlist na tumalo sa kanyang mga kababayang sina Daniel Reyes at Walter Tello.

Itataya ng 27-anyos na si Nietes ang kanyang WBO belt sa ikatlong sunod na pagkakataon makaraang talunin sina Nicaraguan Eddy Castro at Mexican Erik Ramirez via second-round KO at unanimous decision, ayon sa pagkakasunod. (Russell Cadayona)