Niños mipaluhod sa Landmasters

CEBU, Philippines - Makabungog nga 3-point shot ni Bruce Dacia sa himalatyong oras sa duwa maoy gihimong hagdanan sa M. Lhuillier Kwarta Padala-Cebu Niños paglugit og daog batok sa silingang karibal Cebu Landmasters-Mandaue, 70-66 pagsugod sa Misamis Oriental leg sa Smart-Liga Pilipinas Conference III niadtong miaging gabii didto sa Arturo S. Lugod Memorial Sports and Cultural Center sa Gingoog City.

Sakit kaayo ang kaparotan nga nasinati sa Landmasters ni Joe Soberano ug coach Jun Tan kay sila man ang nidominar sa tibuok duwa hangtod nga milunod og tres si Dacia aron luwason ang Niños ni Michel J. Lhuillier ug coach Raul 'Yayoy' Alcoseba.

Ang Niños,mao na lang ang bugtong koponan niini nga conference nga gipaluyohan sa Smart, Accel, Molten, Calcium-Cee, Gatorade, Air 21, Burlington ug sa Samahang Basketbol ng Pilipinas (SBP).

Si Dacia, kinsa maoy MVP sa Cebu leg tulo ka semana ang nilabay, padayong mipakita sa iyang maayong labok dihang mibubo siya og 23 puntos.

Daku sab og natabang si Woodrow Enriquez, kinsa  miabuno og 18 puntos uban ang lima ka rebounds ug upat ka assists. 

Sa naparot nga Landmasters gipangulohan ni Niño Jercules Tangkay, kinsa miposte og 19 puntos, lima ka rebounds ug duha ka steals.

Sa pasiunang duwa, ang Misamis Oriental Meteors ni Gov. Oscar Moreno ug coach Jun Noel nakabangon gikan sa 18 puntos nga lubong aron pagbuntog sa GenSan MP Warriors sa iskor nga 75-73.

Ang guwardiyang si Guard Lyndon Gudez maoy nangulo sa maong kadaugan pinaagi sa iyang 21 puntos lakip na niini ang upat ka tres. 

Ang aksiyon sa Liga Pilipinas dad-on karon sa Xavier University Gym alang sa rematch sa miaging conference National Finals tali sa Meteors ug ang Niños. 

Ang Meteors maoy nidaog sa maong kulbahinam nga best-of-five series, 3-2.  

Puntos Matag Usa

Unang duwa:

Cebu (70) - Dacia 23, Enriquez 18, Nailon 10, Padilla 6, Mepana 5, Santos 4, Ababon 2, Saladaga 1, Basco 1

Mandaue (66) - Tangkay 19, Cenita 13, Solis 9, Bucao 7, Alcaraz 6, Latonio 6, Llanto 4, Mercado 2

Ikaduhang duwa:

MisOr (75) - Gudez 21, Cabahug 13, Daja 7, Saldua 6, Moreno 5, Butel 4, Tagupa 4, Clavel 3, Kong 3, Pupos 3, Mamaclay 3, Guiyab 2, Barcellano 1

GenSan (73) - Gonzaga 17, Concha 12, Mendoza 10, Rubi 6, Farochillen 5, Cabatu 5, Tadena 4, Locsin 4, Coronado 4, Sagad 3, Medalla 3. – BANAT NEWS