Bautista mo-away karong Oktubre 16

CEBU, Philippines - Duha ka tuig ang milabay human sa iyang mapintas nga kapildihan sa mga kamot sa Mehikanong si Heriberto Ruiz, subli na usab nga mokatkat ibabaw sa ring ang ALA Boy nga si Rey 'Boom Boom' Bautista ug ning higayona iyang sangkaon ang WBC International featherweight champion nga si Rachamongkol Sor Pleonchit sa Thailand karong Oktubre 16 diha sa Waterfront Cebu City Hotel.

Walay laing tuyo si Bautista karon kun dili mao ang pagbuntog ni Pleonchit aron maila og balik ang iyang ngan sa kalibotan sa boksing.

Si Bautista mipahuway og pipila ka bulan aron magpaalim sa iyang na-injured nga kamot.

Sa laing bahin, si Pleonchit gihulagway sa iyang promoter nga si Kokiet Panachiyarom nga dili sayon nga boksidor ug tinguha nila nga pildihon si Bautista sa kaugalingon niining balwarte.

Uban ni Bautista nga mosangka mao ang iyang kababayan nga si Czar Amonsot batok sa wala pa mailhing kontra.

Si Amonsot maninguha karon nga modaog aron mahatagan siya og kahigayonan nga mo-away og balik alang sa kalibotanong titulo.

Si Amonsot gikan karon sa duha ka sunod-sunod nga daog batok nila ni Zoel Fidal ug Morris Chule.

Gawas nila ni Bautista ug Amonsot, laing ALA fighter nga si Jason Pagara ang mo-away usab sa undercard. – BANAT NEWS