SHS-J booters nakasulod sa semifinal round sa 14th Milo Little Olympics-Visayas

CEBU, Philippines - Naluwas sa penalty shootout ang Sacred Heart School-Jesuit (SHS-J) batok sa Don Bosco College, 4-3 nga labing unang higayon nakasulod sa semifinals sa secondary boys football event sa 14th Milo Little Olympics-Visayas eliminations niadtong Domingo diha sa Cebu City Sports Center.

Sikit kaayo ang duwa sa duha ka kampo nga miresulta sa panagtabla, 2-all paghuman sa regulasyon. Sa penalty shootout, ang SHS-J miposte og 2-1 batok sa Don Bosco alang sa ilang kadaugan.

Sa wala pa ang ilang duwa batok sa Don Bosco, ang SHS-J nimasaker sa M-ZED Banawa, 6-0.

Sa laing bahin, ang batan-ong SHS-J nakaangkon og luna sa semis sa elementary boys division human nila gilansang ang Subangdaku Elementary School, 6-1.

Nakasulod sab sa sunod hugna ang PAREF-Springdale human nila sirohi ang Bright Academy, 7-0 ug ang Pope John Seminary, 8-0.

Ang Abellana National School miabante sab sa semis dihang ilang gipanamastamasan ang Cebu Institute of Technology, 22-0 ug ang St. Francis de Assisi, 16-0.

Mikulit sab og dobleng kadaugan ang Compostela National High School human ilang gipilde ang USC, 3-1 ug ang Mandaue Technical Institute, 4-2.

Sa elementary division, nagpabiling lig-on ang PAREF-Springdale sa kampanya pagpanalipod sa ilang titulo human mikulit og 4-3 nga kadaugan pinaagi sa penalty shootout batok sa Canduman Elementary School.

Ang Don Bosco mimasaker sa St. Paul Learning Center, 15-1 ug sa Til-Tilon Elementary School sa Liloan, 10-1 aron pag-abante sa penultimate round. (Yoyo R. Abayan)   (BANAT NEWS)