Panglawgaw sa SBP

CEBU, Philippines - Hinayhinay nang milutaw ang tinuod nga bulok o color niining Samahang Basketbol ng Pilipinas (SBP) nga dili gyud alang sa kaayohan sa basketbol sa nasud ang ilang tumong kung dili ang ila ra gyud kaugalingong interes, kahakog sa gahum ug ka-uhaw sa publisidad.

Nakapagawas ako niining maong panahom dihang na-atlan nako sa usa ka haponong sports program sa telebisyon nga nagtaho niining usa ka kontrobersiya karon nga naglambigit sa no.1 PBA draftee nga si Japeth Aguilar kinsa wala modayon og pirma sa nagkuha kaniyang PBA team nga Burger Machine ni coach Joseller “Yeng” Guiao, ang coach sa Team Pilipinas sa mga international competition.

Nakasabot ako nga wala’y labot niini si Aguilar, ang anak ni kanhi PBA star Peter Aguilar ug nakaduwa sa Western Kentucky kay iya kining katungod kung mopirma ba siya’g kontrata sa Burger Machine ug dili.

Tataw nga gipili ni Aguilar ang Team Pilipinas dili tungod kay gusto siyang motabang sa nasud. Ang pagtapon niya didto sa Western Kentucky og pagbiya sa Pilipinas gikan sa Ateneo Blue Eagles usa ka tilimad-on nga kuwang sya’g loyalty sa Pilipinas.

Apan kung walay kalabotan niani si Aguilar ug ang iyang manager nga Pakistani nga walay laing kamaohan nga trabaho kung dili ang pag-analisar og basketbol ug boksing nga si Ronnie Natanielsz, si kinsa may atong rumbohon nianing hitaboa?

Sa kadaku og gahum ni Manny V. Pangilinan sa SBP, nganong wala man niya tambagi si Aguilar nga modayon pagpirma sa Burger Machine nga unta makadugang man kini sa iyang kita kung kwarta man ang iyang gusto. Kanang PBA usa kana ka grupo sa mga professional athletes nga angay mobarug niining gitawag og “gentleman’s agreement”.

Busa, kung dili makahimo sa pakigsabot si Pangilinan sa taga PBA, unsaon man niya pakigsabot sa minilyon ka katawhan nga gustong magkahiusa ang atong nasud sa basketbol? Kinsa may ilang patuohon niini?

Ako nagduda nga kung walay kalabotan si Pangilianan ani, usa na sab kini ka maniobra ni Noli Eala ug kining Team Pilipinas gihimo na kini niyang negosyo aron padayon silang makakuha’g pondo ug padayon ang iyang paglulinghayaw sa laing nasud matag salmot sa Team Pipilinas ug international basketball competiton.

Naluoy ako nagtan-aw sa TV ni Lito Alvarez, ang team manager sa Burger Machine nga daw batang gamay nga gi-ilogan og lollipop. Kung naluoy sila si JB Baylon sa Coke ug si Buddy Encarnado sa Sta. Lucia ngadto kang Alvarez, walay katarungan nga dili maluoy si Eala kay gikan siya sa PBA isip kanhi commissioner.

Halos tanang players sa Pilipinas nangandoy nga makaduwa og PBA kay kini maoy tugbang sa NBA. Matag tuig nga mosalmot ang Pilipinas og dagkung torneyo, ilang hulaman ang mga PBA players ug karon diay gikuha na sa PBA, ilang pugngan aron dili makaduwa? Asa man planetaha sa solar system kini nato makita? Of course, as what the bystanders would always say “Only in the Philippines.”

Dinhi imong makita nga walay pakialam si Eala ug ang importante alang kaniya mosikat siya ug makakwarta. Iya kanang trabaho pagsulbad isip executive director sa SBP, dili lang tungod kay usa siya sa salesman niining grupoha nga kung adunay dili niya mauyonan kay makadaot alang kanila, iyang tagoan ang kamatuoran. Tama na, huwag na at sana tigilan mo na.

Nganong dili man ninyo pikpikon ang abaga ni Aguilar aron mausab ang iyang baruganan inay inyong hayloan og dakong kwarta nga makalibog hinuon sa pangutok sa bata aron iyang tumanon ang kasabotan tali sa Burger Machine.

Sa kalinghod sa pangutok ni Aguilar, dili ako motuo nga walay dagkung personalidad sa sports nga nagpaluyo niini.

Hinaot unta nga ila kining sulbaron sa madaling panahon aron mobilib kita’g samot sa SBP kung angayan man ugaling. Basin baya og dunay virus nga giturok ngadto kang Aguilar aron dili na siya modayon pagduwa sa PBA.

Kanimo Japeth, dili ang imong presensiya sa Team Pilipinas ang makapahimong kampiyon ug nakahibalo ka niana nga dili ka ingon ka maayong laki ni Michael Jordan, Kobe Bryant ug Lebron James. Aguilar, ayaw tinuntohi ang PBA tungod lang kay dakong salapi ang ihatag kanimo sa SBP.

Huwata lang nga makaduwa si June Mar Fajardo sa PBA ug dinha nimo maila nga dili kay ikaw ray maayong laki. Di ba CESAFI fans?

SG Miscellaneous. Advance happy birthday to my lovely daughter Nicole Malagar who turns 14 years old this coming September 10 the same birthdate of City Prosecutor Nicolas Sellon and the date of San Nicolas de Tolentino annual fiesta. Condolence to the Medalle family of barangay Punta Princesa for the death of Ernesto Medalle, Sr. - BANAT NEWS