CEBU, Philippines - Ang gikahinaman nga 2009 Talisay City Mayor's Cup Inter-Barangay Basketball Tournament moulbo na karong hapon diha sa Talisay City Sports Complex.
Napulog walo (18) ka koponan nga gibahin ngadto sa upat ka brackets ang mag-ilog sa dungog alang sa SK division.
Ang bracket-A gilangkuban sa Dumlog, San Roque, San Isidro, Camp 4 ug Lawaan 2, samtang ang bracket-B naglangkob sa Tabunok 1, Lawaan 1 ug 2 ug Poblacion 2.
Sa bracket-C, mao ang Maghaway, Tabunok 2, Poblacion 1 , Jaclupan ug Linao, samtang ang nagtapok sa bracket-D mao ang Pooc, Cansojong, Mohon ug Bulacao.
Sa laing bahin, ang seniors category aduna lamang kini duha ka brackets - A ug B.
Mga koponan ubos sa bracket-A mao ang Dumlog, Tabunok 2, Poblacion 2, Pooc, Lawaan 1 ug San Isidro, samtang sa bracket-B mao ang Tabunok 1, Lawaan 1 ug 2 ug Poblacion 2.
Si Kongresista Eduardo R. Gullas sa unang distrito sa lalawigan sa Sugbu ug si Mayor Socrates Fernandez maoy mga pinasidunggang dinapit ug mamumulong sa opening ceremony karong adlawa.
Si konsehal Osmundo Monreal Jr., presidente sa Liga ng mga Barangay mao ang mobatbat sa oath of sportsmanship, samtang si city councilor Rodi Cabigas, kinsa maoy committee chairman sa Games, Amusements and Professional Sports maoy modeklarar sa pormal nga pagbukas sa torneyo.
Ang maong torneyo gipasiugdahan sa Talisay City Sports Commission nga gipangulohan ni executive director Engr. Jeanneth Villagonzalo ug Sangguniang Kabataan Federation.
(Lemuel P. Maglinte)