CEBU, Philippines - Gisubha'g daog ang defending champion Sacred Heart School-Jesuits (SHS-J) ug ang University of San Carlos (USC) North Campus batok sa tagsa-tagsa nila ka kaatbang sa pagsugod sa Milo-BEST Center SBP/ Passerelle Twin Tournaments diha sa USC North gym.
Ang reigning Visayas ug Cebu Paserelle division champion SHS-J milubong sa University of San Jose-Recoletos (USJ-R), 74-47, samtang ang 2008 Small Basketeers Philippines (SBP) champion USC North mipukan sa USC South, 54-46.
Nangharos usab ang duha pa ka koponan sa host team ang USC North-A nidaog batok sa SHSJ-B, samtang ang USC North-B miihaw sa University of Southern Philippines Foundation (USPF) sa Passerelle match.
Ang Passerelle division nga gilangkuban og 12 ka koponan gibahin ngadto sa duha ka grupo -- A ug B. Ang Group A naglakip sa SHSJ-, Cebu Institute of Technology (CIT), Don Bosco-B, USC North-B, USPF ug USJ-R, samtang ang Group-B naglakip sa 2008 runner-up USC North, University of Cebu (UC), USC South, Don Bosco-A, SCSIT ug SHSJ-B.
Ang SBP division adunay walo ka koponan nga gibahin sa duha ka grupo. Sa Group ang defending champion USC North-A, USC South-A, SHSJ-B ug Cebu Eastern College (CEC) mao ang magtigi, samtang naglangkub sa Group B mao ang 2008 runner-up Don Bosco, SHSJ-A, USC South-B ug USC North-B.
Ang makampiyon sa Cebu leg sa Passerelle ug SBP maoy morepresentar sa Sugbu alang sa regional finals nga ipahigayon didto sa Roxas City karong Nobiyembre. Ang national finals ipahigayon karong Nobiyembre 20-22 didto sa Baguio. - BANAT NEWS