CEBU, Philippines - Gipahimuslan nila ni Revodem Aranas ug Aiza Suwaybaguio ang wala pagsalmut sa top runners, human sila nanghawud sa 10K division sa labing unang Diamond Lions Club Run kagahapon diha sa Sumilon Road sa Cebu Business Park.
Si Aranas mipukan sa higpit niyang kaatbang nga si Reprinel Banzon aron masakmit ang kampiyonato sa men’s division sa oras nga 33:13.06.
Ang beteranong si Banzon nitapos sa lumba sa oras nga 34:01.43 alang sa second place, samtang si Ian Bernido nilandig sa third place sa oras nga 35:53.86.
Sa women’s division, si Suwaybaguio maoy reyna sa kadalanan human niya gitapos ang lumba sa oras nga 43:58.68. Si Jennifer Bellocura nagsunod ni Suwaybaguio sa second place sa oras nga 44:58.68, samtang si Rose Baylon nipahiluna sa third place sa oras nga 48:28.
Migawas usab nga labing paspas nga runner si Tomas Nuñez Jr. alang sa masters A class sa oras nga 39:01.52, samtang si Ruth Banzon mao usab ang nikampiyon sa masters B sa oras nga 39:2:.26.
Si Jorry Ycong nidominar sa 5K run sa men’s bracket sa oras nga 17:12.90 ug si Mary Joy Tabal maoy niangkon sa titulo sa women’s division sa oras nga 2:00.15.
Sa 3K run, si Prince Joey Lee maoy labing paspas dihang gihuman niya ang lumba sa oras nga 12:31.73, gisundan nila ni Jommel Edar (15:30.30) ug Brett Tabanas (17:23.71) -nga mipahiluna sa ikaduha ug ikatulong dapit.
Wala usab magpa-uwahi sila si Bea Beronia (16:23.97), Miriam Potot (30:28.98) ug Amanda Macariola (31:53.56) alang sa top three sa 3K girls division. - Lemuel P. Maglinte (BANAT NEWS)