Banal mobanat na

CEBU, Philippines - Sa nagkadaghan nga mga misulbong nga Pinoy fighters sa kalibotan sa boksing karon, higayon na sab sa Sugbuanong bantamweight prospect AJ 'Bazooka' Banal nga mopakita sa iyang kabangis sa undercard sa Brian Viloria-Jesus Iribe showdown karong adlawa didto sa Blaisdell Arena sa Honolulu, Hawaii. Si Banal (19-1-1,16 KOs) moyagyag na sa bunga sa kapin sa tulo ka buwan niya nga ensayo sa ALA gym ug didto sa WildCard Gym sa California batok sa beteranong boksidor nga si Jose Angel Beranza (32-15-2, 25 KOs) sa Mexico sa usa ka 10-rounder bout.

Ang tag-iya sa nabantog nga ALA Gym nga si Tony Aldeguer, nagkanayon nga kinahanglan seguraduhon ni Banal ang kadaugan karong adlawa aron mosaka pa siya sa ranking alang sa gipangandoy niining world title fight batok sa mga dekalibreng boksidor sama nila ni Fernando Montiel, Vic Darchinyan ug Christian Mijares.

Atol sa weigh-in kagahapon didto gihapon sa Blaisdell Arena, ang kanhi WBO super flyweight champion nga si Banal mitimbang og 118.75 lbs., samtang si Beranza mitimbang og 118.25.

Masaligon si Aldeguer nga si Banal maoy mopatigbabaw sa maong away tungod kay saksi siya sa grabeng ensayo niini ubos sa giya nila ni three-time trainer of the year Freddie Roach ug Edmund Villamor.

Sa main event, si IBF junior flyweight champion nga si Viloria mibahad nga iyang pakamangon ang Mexican challenger nga si Iribe sa labing una niyang title defense.

Ang Fil-American nga si Viloria mitimbang og 107.5 lbs., samtang si Iribe mitimbang og 108 lbs.

Gawas nilang Viloria ug Banal, laing Pinoy boxer nga si Dennis Laurente ang mopakita sab og aksiyon batok sa Mehikanong si Zaid Zavaleta ubos gihapon sa undercard.   (BANAT NEWS)