Pagdepensa sa titulo ng American duo pipigilan ng mga Pinoy pair

MANILA, Philippines - Magbabalik para sa isang mas matinding sarguhan, magpapakitang gilas ang kampeong duo nina Rodney Morris at Shave Van Boening para sa PartyCasino.net World Cup of Pool na sasargo simula Setyembre 1-6 sa SM City North EDSA.

Kabilang sa mga malalaking pangalang babandera at handang talunin ang mga Kano sa kumpetisyon na may nakatayang $60,000 ay sina Efren `Bata’ Reyes at Francisco `Django’ Bustamante ng Pilipinas at 2007 champion Li Hewen at Fu Jianbo ng China.

Binubuo ng may 32 teams ang lalahok sa torneong inorganisa ng Matchroom Sports sa pakikipagtulungan ng Solar Sports ng Pilipinas.

Ang iba pang nagnanais maiuwi ang prestihiyosong korona ay kinabibilangan nina dating world champion Ralf Souquet at Thorsten Hohmann ng Germany, Dutchmen Nick Van Den Berg at Niels Feijen, at reigning World 10-Ball champion Darren Appleton ng England, na makakapareha ni Imran Majid.

 Samantala, bilang host ng naturang six day competition, mayroong pagkakataon ang Pilipinas na magkaroon ng dalawang kinatawan.

Kinokonsidera bilang dark horse, sasabak sa laban ang two time world titlist Ronnie Alcano at money game Dennis Orcollo.

Sa unang pagkakataon rin sa kasaysayan ng pool, magkakaroon ng all female team na ipaparada ng Korea sa pangalan ng women’s world No.1 player Ga Young Kim at Yun Mi Lim. (Sarie Nerine Francisco)