UC Juniors, 4-0 na

CEBU, Philippines - Gipamatud-an sa University of Cebu (UC) Junior Webmasters ang ilang kamangtas human nila paniting buhi ang University of Southern Philippines Foundation (USPF) Baby Panthers, 90-79 sa bugtong duwa sa secondary division sa 9th Cebu Schools Athletic Foundation Inc. (CESAFI) basketball event kagabii diha sa Cebu Coliseum.

Wala kahungaw ang kainit sa Junior Webmasters sa unang-kuwarter dihang daghan kaayo'g usik ang ilang mga tirada hinungdan nabiyaan kini og kuwatro puntos sa halftime, 34-38.

Gawas nga naglisod kini pagkuha og puntos, naglisud sab kini pagdepensa ni Rommel Diapera, kinsa nagmangtas alang sa Baby Panthers.

Si Diapera maoy milawog sa Baby Panthers sa ilang kinadak-ang labaw, 38-31 sa wala pa motira si Pingoy og 3-point shot aron laslasan ang labaw sa halftime.

Ang guwardiya nga si Oscar Pua maoy nakapalabaw og balik sa Junior Webmasters sa pagsugod sa third period, 39-38, bisan pa sa masidlakon nga performance ni Diapera, maoy topscorer sa Baby Panthers sa iyang 26 puntos lakip na ang upat ka triples.

Human nailog ang momentum, ang Junior Webmasters mao na ang nikontrolar sa duwa ug ilang gitapos ang third period sa iskor nga 67-59.

Ang maong labaw nakahaling og maayo sa kainit sa Junior Webmasters sa final period diin si Ampoon uban nilang Alfred Codilla ug Ruel Padilla Jr. mikiat og maayo aron mamentinar ang ilang 10 puntos nga labaw, ang katapusan sa iskor nga 80-70 sa tunga-tungang bahin sa duwa.

Inay nga mosurender, ang Baby Panthers mipakita hinuon sa ilang kalagsik dihang si Christian Baguio mikompleto sa iyang three-point play aron kan-an ang labaw ngadto sa 77-82. Apan didto ra kutob ang kabangis sa Baby Panthers kay ang Junior Webmasters nagmabinantayon na sa ilang lihok hangtod nga naangkon ang ilang ikaupat nga sunod-sunod nga daog.

Sa maong kadaugan, ang Junior Webmasters nagsawo sa liderato uban sa University of the Visayas (UV) Baby Lancers sa managsamang 4-0 win-loss records.

Ang rookie guard nga si Jorei Marlon Pingoy, kinsa beterano na kaayong moduwa maoy topscorer sa Junior Webmasters pinaagi sa iyang 17 puntos, gisundan ni Alexander Nazareno nga adunay 16 puntos, samtang sila si Codilla ug Ampoon nagkumboya og 27 puntos.

PUNTOS MATAG USA

UC (90) - Pingoy 17, Nazareno 16, Codilla 14, Ampoon 13, Aranas 9, Labolabo 6, Talisic 5, Pua 4, Saramosing 2

USPF (79) - Diapera 26, Baguio 14, Corcilles 11, Pitogo 10, Salazar 6, Tumulak 4, Rosales 3, Lambujon 2, Gigante 2, Catipay 2  (BANAT NEWS)