4th CDU Run mosikad na karon

CEBU, Philippines -  Magginukdanay na ang kapin sa 5,000 ka runners sa pagsikad sa 4th edition sa Cebu Doctor's University (CDU) Run karong adlawa diha sa north reclamation area.

Sila si defending champion Elmer Bartolo ug Madelyn Carter manalipod sa ilang tagsa-tagsa ka titulo batok sa mga dekalibreng runners.

Si Bartolo makigbangga sa mga lig-ong runners sama sa managsuong Delposo ug PhilipDueñas sa men's division.

Samtang si Carter dili basta-basta nga modepensa sa iyang korona kay modagan gihapon ang batan-ong runner nga si Mary Grace delos Santos sa Zamboanga City.

Si Delos Santos nidaog sa tanang lumba nga iyang naapilan dinhi sa Sugbu.

Mga prominenteng personalidad sama ni Senator Pia Cayetano, Donna Cruz Larrazabal ug iyang ig-agaw nga si Sunshine Cruz ug Cesar Montano ang modagan sab sa maong kalihukan.

Ang lumba nga gipaluyohan sa Sun Cellular naglatid sa 10K run alang sa men ug women's open ug doctor's class, 5K alang sa CDU students ug employees ug ang 3K alang sa fun runners ug ingon man mga tinun-an.

Ang mga mananaog makadawat og ganting salapi ug medalya. Adunay ihatag nga special awards sama sa youngest ug oldest runner ug liveliest group.

Lain pang mipaluyo sa lumba mao ang HSBC, 2Big ug ang Cebu Doctors Group of Hospital.   (THE FREEMAN)