USPF, USJ-R pabiling lig-on

CEBU, Philippines - Adunay dakung kahigayonan ang defending champions University of Southern Philippines Foundation (USPF) ug University of San Jose-Recoletos (USJ-R) nga mapanalipdan ang ilang tagsa-tagsa ka korona sa 9th Cebu Schools Athletic Foundation Inc. (CESAFI) volleyball event nga mosikad karong Sabado diha sa University of San Carlos (USC) main gym.

Kini gumikan kay hitsas ug solido pa gihapon ang ilang line-ups.

Si coach Jordan Paca sa USPF nagkanayon nga dugay na silang nag-ensayo niadto pang bulan sa Mayo ug nisalmot pa kini og nagkadaiyang mga torneyo aron mabaid ang mga talento sa iyang mga players.

Ang heart and soul sa USPF nga si Erika Camille Verano mipalanog sa pamahayag ni Paca nga nagkanayon nga ang ilang pagsalmot og mga nagkalain-laing mga kompetisyon sa miaging summer makatabang og daku sa ilang kampanya sa pagpanalipod sa ilang titulo.

Sa pikas bahin, ang USJ-R ni Cebu Hall of Famer coach Grace Antigua nagsalig sa malahutayon niyang koponan ug ingon man ang pagdugang sa ilang rookie nga si Kevin Casia ug ni kanhi USPF spiker Jade Johnson. – BANAT NEWS