SVD daog sa XVD sa exhibition game
CEBU, Philippines - Mipakita sa ilang abilidad sa natad sa basketbol ang mga kaparian sa Society of Divine Word (SVD) ug ilang gipilde ang XVD squad, 77-73 sa exhibition game kagahapon diha sa University of San Carlos (USC) main gym.
Ang XVD squad nga gilangkuban sa mga kanhi seminarians, mihimo og impresibong duwa pagsugod human milabaw og otso puntos sa halftime, kortesiya ni Vic Canseco, ang kanhi magduduwa sa Cebu Doctors University (CDU).
Bisan pa niini, wala kawad-i sa paglaum ang SVD ni Fr. Andy Guban nga mosakmit og daog ug nakabangon kini sa ikatulong kuwarter ubos sa pagpangulo nilang Fr. Jimmy Sales ug Fr. Serge Paganao.
Nagsinukliay og mga puntos ang duha ka kampo hangtod nga naangkon sa SVD ang labaw sa himalatyong oras sa duwa ug wala na makarekober ang XVD sukad niadto.
Si Fr. Paganao maoy topscorer sa SVD pinaagi sa iyang 19 puntos. Sila si Fr. Sales ug Fr. Joey Sepe nagkumboya og 25 puntos. Ang pilderong XVD gipangulohan sab ni Fr. Canseco, kinsa mihipos og 42 puntos.
"We decided to have basketball since this was the main sport in the seminary. This serves to be a recall of the days we have in the seminary, but its no longer the same as it used to be since most of us have come of age," matud pa ni Rome-based Superior General Fr. Antonio Pernia, SVD.
Ang nahisgutang exhibition usa sa mga kalihukan sa centennial celebration sa Societas Verbi Divini (SVD) nga natukod dinhi sa Pilipinas niadtong Agosto 15, 1909.
Sa laing bahin, ang kanhi SVD seminarians mitukod og grupo nga gitawag og SVD Crusaders Inc. Natukod kini niadtong tuig 1983 sa tuyo nga mapadayon ang ilang misyon pagsangyaw sa maayong balita.
Puntos Matag Usa
SVD (77) - Paganao 19, Sales 16, Joe. Sepe 9, Tallas 8, Gado 6, Mahinay 5, Nachima 4, Lepatan 3, Cagape 3, Solis 2, Ducoy 2
XVD (73) - Canseco 42, Jon. Sepe 22, Villagonzalo 9, Bonzongaita 2. – BANAT NEWS
- Latest
- Trending
