Maroon misakmit korona sa HFBC caging

CEBU, Philippines - Si Arnel Roy miposa og 26 lakip na ang tulo ka triples aron pangulohan ang Maroon pagpukan sa Red, 100-89 ug aron maangkon ang titulo sa Holy Family Basketball Club didto sa Wilfredo Cabalse Memorial Gym, Brgy. Mabolo,ning siyudad.

Ang duha ka koponan kinsa nipukan sa tagsa-tagsa nila ka mga koponan sa semis, mipakita sa daku nilang tinguha nga masakmit ang kampiyonato human sila nagsinukliay og mga puntos nga miresulta sa panagtabla, 22-all.

Nakaginhawa og diyutay ang Maroon dihang na-outscored nila ang Red sa third period sa pagpangulo nila ni Roy ug Ace Ompok nga nagkumboya og 14 puntos. Si Franz Lepiten mibugha og 10 puntos alang sa kuwatro puntos nga labaw 73-69 sa katapusang 10 minutos sa duwa.

Nameligro ang Maroon sa katapusang singko minutos sa duwa dihang nanginit si Ondoy Armecin, kinsa mihimo og 15 sa iyang kinatibuk-ang 30 puntos sa final period aron matabla ang iskor, 84-all.

Apan ang init nga mga kamot ni Roy, kinsa miiskor sa katapusang nuybe puntos maoy mibaswat sa Maroon ngadto sa kadaugan.

Sa maong kadaugan, ang Maroon mibulsa og P1,500 ug tropeyo, samtang ang Red nakadawat og P1,000.

 Puntos matag usa

Maroon (100) - Roy 26, Lepiten 24, Ompok 12, Cabrijas 11, Borces 8, Funtanar 5, R.Ortiz 4, Cortez 4, Yap 3, Dalo 3

Red (89) - Ondoy 30, Migallos 11, Mayol 9, Helaria 9, Donaldo 9, Benzi 6, Nino 6, Montera 4, R.Ortiz 3, Jardin 2   (BANAT NEWS)