Sip-Ranchai gibalian ni Cubillas

CEBU, Philippines - Nanginahanglan lang og usa ka minuto ug 40 segundos si Ricardo “D Hammer” Cubillas aron pahunungon ang Malaysian nga si Samchai Sip-Ranchai pinaagi sa submission sa ilang sangka niadtong miaging gabii sa Ground & Pound V: Retributuion dinha sa Cebu Coliseum.

Si Cubillas sa Butuan Extreme MMA nipakita sa iyang abilidad dihang iyang gibalian si Sip-Ranchai nga maoy nakapaaghat sa referee nga ihunong ang away.

Sa main event, nipatigbabaw ang kusug ni Ali “The Grappler” Malawi sa mixed Fighting System sa Lapu-Lapu aron paundangon si Voltaire “Rough Neck” Gonzales sa Tagbilaran City Red Dragon MMA sa unang round.

Gipukan usab ni Renan “Limbas” Noblefranca sa Yaw-Yan Cebu Ardigma ang garbo sa Mindanao nga si Jobert “Da Sniper” Baylin sa ilang kick boxing bout. Nidaog usab sa iyang debut match si Johnlery “Ian” Caniga pinaagi sa usa ka guillotine choke batok ni John Kevin Amores sa Bullet Muay Thai sa oras nga 4:42 sa first round.

Sa undercard, si Jeff Malicay mipahunong ni Gerry Hinampas, samtang si Geronimo Etac nipatumba ni RG Sevilleno ug Alan Atup midaog batok ni Jolly Manalo.

Mipatigbabaw usab si Eric Areglado kontra ni Randy Morres, Romero Esfra milatos ni Michael Minggeta, Jecar Vender mipukan ni Marvin Camba, samtang si Jorex Rivera milampos pagpahunong ni Jonathan Climaco. - Lemuel P. Maglinte (BANAT NEWS)