CEBU, Philippines - Pabiling walay pilde ang Super Idols quintet ni coach Atty. Bong Pepito sulod sa lima ka sagunson nga duwa human ilang gipangagan ang Pistons nga gipanghulohan sa Rama brothers nga sila si Estong ug Noly sa iskor, 83-60 kaniadtong Sabado atol sa nagpadayong 3rd season sa Integrated Bar of the Philippines (IBP) basketball tournament didto sa Capitol Parish gym sa dalan Escario, ning dakbayan.
Bisan og unom lang ka players ang miduwa alang sa Super Idols, wala gihapon sila magpalupig ug sila kanunay maog naglabaw pinaagi sa 24-13 sa first period ug miburot ang labaw ngadto sa 45-22 atol sa halftime ug ang Rama brothers wala lang gihapon mopakita og pagbabag hangtod na didto sa second half.
Sa sayo pa, ang Pecandela Law Firm mipatapsing sa YLAC, 79-78 samtang ang Casino Rubbing Alcohol naka-ipsot batok sa Mt. Zion sa iskor, 84-80.
Sa kataposan ug ika-upat nga duwa niadtong Sabado, ang Pañeros mipukan sa walay daug-daog nga Opascor Eagles, 78-65.
Si Benjo Santiago maoy nangu sa Super Idols pinaagi sa iyang 31 puntos ug ang three-point artist nga si Flor Yosores midugang og 18 puntos uban sa iyang tulo ka three-pointers.
Sila si Giovanni Sususco ug Lito Ortiz maoy nangu sa Pistons sa ilang 16 ug 13 points, matag usa kanila.
Si Mark Gamallo maoy nahimong bayani sa Pecandela human siya makapasulod og duha ka free throws sa kataposang unom ka segundos.
May 20 segundos na lang unta ang nahibilin aron modaog na ang YLAC kinsa maoy naglabaw, 78-77 apan nakakubit og foul si Gamallo ug maoy mipadaog sa iyang team.
Si Sam Malazarte maoy nangu sa Pecandela sa iyang 20 puntos samtang si Gamallo miabuno og 16 puntos.
Ang YLAC gipangulohan ni Val Lingutan kinsa mihipos og 28 puntos ug si Resty Arnaiz mitunol og 19 puntos.
Puntos matag usa:
First Game:
Super Idols (83)—B. Santiago 31, Yosores 18, Quijano 14, Abayon 10, V. Santiago 6, Malig-on 4
Pistons (60)— Sususco 16, Ortiz 13, Alviola 8, Alforque 8, M. Rama 4, Cedeño 4, Pascua 4, Quiban 2, E. Rama 2
Second Game:
Pecandela (79)— Malazarte 20, M. Gamallo 16, Pepito 12, Yu 12, Tafsip 10, I. Gamallo 4, Avila 3, Cañete 2
YLAC (78)— Lingutan 28, Arnaiz 19, Hupp 8, Adlawan 6, Napuli 5, Villaren 4, Sapayan 4, Ang 2, Calungsod 2
Third Game:
Casino (84)— Bauzon 22, Mañus 17, Sumampong 14, Limalima 12, Bragat 7, Dumon 6, Tambago 4, Yap 2
Mt. Zion (80)— Macion 20, Riveral 13, Gidayawan 12, Javelosa 12, Macabaja 5, Elmido 5, Narido 4, Del Prado 4, Geotina 3, Ungab 2
Fourth Game:
Pañeros (78)— Feliciats 15, Balorio 13, Busi 10, Ruaya 8, Molde 8, Calipayan 7, Cabilte 6, Ordeniza 6, Cagulada 5
OPASCOR (65)—Lagahit 17, Godornes 12, Santos 12, Hiyas 9, Cedeño 8, Vallecer 7, Abcede 2. - Gabby G. Malagar (BANAT NEWS)