Kidneycare mibuntog sa Orofer sa USCBHABA-Atan Guardo Cup

CEBU, Philippines - Buwag nga dalan ang gisubay sa managsuong koponan Kidneycare ug Diabet sa nagpadayong aksiyon sa University of San Carlos Boys High Alumni Basketball Association (USCBHABA) Atan Guardo Barkadahan Cup Second Season diha sa USC-North campus gym.

Ang Kidneycare '87 mipukan sa Orofer sa iskor nga 77-67, samtang ang Diabet napukan sa 3K Caterers sa iskor nga 82-84.

Ang Kidneycare maoy midiktar sa tiyempo sa duwa ug miposte og otso puntos nga bentaha, 22-14 paghuman sa unang kuwarter. Ang Orofer milaslas sa labaw ngadto sa sayes puntos sa third quarter, 52-58, apan ang Kidneycare nakarekober aron tapuson ang duwa uban ang 10 puntos nga kadaugan.

Sa sayo pa ang 3L Caterers nagsandig sa ilang mainitong rally sa himalatyong oras sa duwa aron pagsakmit og daog gikan sa baba sa kapildihan.

Kanunay nga naggukod ang 3L Caterers sukad kini gilubong og 10 puntos sa unang kuwarter, 15-25, apan milusad kini og 26-19 nga rally sa nanghinapos nga bahin nga maoy gihimong hagdanan pagkab-ot sa kadaugan.

Ang 2009 USCBHABA season gipaluyohan sa Uniherb Philippines, usa sa nag-unang health companies nga tiggama sa nabantog nga food supplements sama sa Arthro, Kidneycare, Heartvit, Diabet, Eyeberry, Athan, Slima, Athan ug Hardman.

PUNTOS MATAG USA

Unang duwa:

3L Caterers (84) - Lopena 27, Lim 26, Borces 12, Sybico 11,Uy 4, Tan 4

Diabet (82) - Lu 21, Canares 18, Velasyo 13, Seno 12, Cabrera 10, Casas 8 

Ikaduhang duwa:

Kidneycare (77) - Catapusan 21, Demecillo 19, De los Cientos 12, Adolfo 8, Simene 8, Bajarias 4, Cuyos 2, Tabares 2, Honorio 1

 Orofer (67) - Javines 15, Baguio 10, Andulana 10, Canada 8, Canabano 8, Madrona 6, Cabilete 4, Lacson 3, Villamor 3 (BANAT NEWS)