Aron molambo ang imong abilidad sa dula, kinahanglang matinud-anon ka sa imong kaugalingon. Kinahanglan nga matinud-anon ka sa pag-ila sa imong kahuyang ug kalig-on diha sa imong pagdula aron pagseguro nga andam ka pagdepensa sa imong dula sa tanang higayon. Sa ingon, masanta ang unsa mang posibilidad sa kapildihan.
Angay mong isilsil kanunay sa imong alimpatakan nga walay perpektong magdudula. Bisan unsa pa kahanas sa usa ka bilyarista, aduna gayod siya'y mga sipyat sa iyang pagdula. May panahon gayod nga mosipyat ang iyang mga tayada tungod lagi kay dili man siya perpektong magdudula ingon nga dili siya perpekto isip tawhanon.
Angay mong angkonon sa imong kaugalingon nga may aspeto gayod sa dula diin ikaw may weaknesses. Ug kining mao mong kahuyang usahay maoy hinungdan sa imong mga sayop diha sa imong pagdula. Ug dili mo angay ibaliwala ang imong mga sayop kay daku kini'g epekto sa imong pagdula. Kinahanglang makakat-on ka'g leksiyon gikan sa imong ning epekto aron mouswag ang imong abilidad isip bilyarista.
"You will never get anywhere if you are tolerant of your mistakes," nagkanayon ang respetadong sports person nga si Ashok Kumar.
Ang buot ipasabot ni Kumar nga dili mouswag ang imong performance isip magdudula kun ikaw dili maghatag og bili sa imong mga sayop. Ayaw ibaliwala ang imong mga sayop kay kini bililhon kaayo. Bililhon ang mga sayop kay kini magsilbe man nga imong magtutudlo nga makaagak kanimo pagmanso sa imong kaugalingon aron ikaw mahanas gayod pag-ayo sa disiplina nga imong gikahiligan.
"You should be your own sternest critic," nagkanayon si Kumar. "You know when you have done something stupid, and you should not let yourself get away with it. Give yourself a strict lecture."
Angay gyud nga ikaw maoy labing sternest critic sa imong kaugalingon isip magdudula kay ikaw man ang labaw nga nasayod sa imong kaugalingon. Kun matinud-anon ka sa pag-ila sa imong kahuyang, seguradong madoktoran ang imong mga kahuyang. Seguradong makita nimo ang imong mga sayop ug makakuha ka'g leksiyon gikan niini. Kay matud pa, ang kasaypanan usa ka magtutudlo. Busa angay kang makakat-on gikan niini.
* * *
(Mga sugyot ug pakisayod? Text sa 0910-8105522). – BANAT NEWS