UV pilde sa UC

CEBU, Philippines - Ang 6-foot-3 rookie nga si Rani Mark Tano mitusak og duha ka krusyal nga three-point shots nga nahimong yawi sa kadaugan sa University of Cebu (UC) Webmasters, 75-73 batok sa eight-time champion University of the Visayas (UV) Green Lancers sa 9th Cebu Schools Athletic Foundation Inc. (CESAFI) basketball event niadtong Domingo sa gabii diha sa Cebu Coliseum.

Karon, suwayan sa Webmasters ni coach Roel Gomez pagkulit og 2-0 nga labaw sa ilang pakigsangka batok sa Cebu Institute of Technology (CIT) Wildcats ubos sa bag-ong coach nga si Gilbert Demape

Ang duha ka triples ni Tano maoy nakapausab sa dagan sa duwa sa Webmasters ug ilang nasakmit ang singko puntos nga labaw, 68-63 sa tunga-tungang bahin sa final period.

Nakapasulod pa unta siya’g laing triple, apan gikanselar kini tungod kay nakatunob siya sa baseline.

Si Tano, kinsa gikan sa Zamboanga City mitapos sa duwa bitbit ang 15 puntos, uban ang tulo ka triples, apan ang 6-foot-9 nga si June Mar Fajardo maoy topscorer sa Webmasters pinaagi sa iyang 19 puntos.

Daghang mga higayon nga modaog ang Green Lancers sa maong duwa, apan nakahimo kini'g mga sayop ilabi na sa katapusang 7.3 segundos dihang nailog ni Kelvin Juliane ang bola.

Ang Green Lancers daling mi-foul ni Juliane, kinsa mipasud   sa iyang free throw nga naghatag sa Webmasters og kuwatro puntos, 74-70.

Sa sunod nga posisyon, si Ritchum Dennison miposa og three-pointer gikan sa tuong bahin aron mosikit pag-usab ang Lancers sa iskor nga 73-74, apan ang duwa dili alang kaniya kay nahutdan na kini sa oras.

Si Dennison maoy nangu sa Lancers sa iyang 20 puntos, samtang sila si Gregory Slaughter ug Junjun Lasala mi-iskor og 14 puntos matag usa alang sa Green Lancers.

 PUNTOS MATAG USA

UC (75) - Fajardo 19, Tano 15, Abella 8, Rogado 8, Quilantang 7, Luceño 6, Gomez 6, Juliane 6

UV (73) - Dennison 20, Slaughter 14, Lasala 14, Olivares 7, Cincoflores 7, Lao 2, Cabahug 2, Diputado 2, Manigque 2, Señeres 2, Mercader 1 Halftime: 38-45 (BANAT NEWS)