CESAFI 2009

CEBU, Philippines - CESAFI season na sab.

Karong Sabado, Agosto 1, buksan ang ikasiyam nga season sa Cebu Schools Athletic Foundation, Inc. (CESAFI) diha sa Cebu Coliseum.

Wala pa ako makakita sa labing bag-ong line-up sa defending champion University of the Visayas (UV) Green Lancers, apan daan na nakong gihimadlan nga mentras anaa pa kanila ang 6-foot-11 nga   si Gregory Slaughter, daku ang posibilidad nga sila lang gihapon maoy mahimong kampiyon. Ang laing Fil-Am gikan sa Hawaii nga si Rene John Saycon dili pa tugotan nga makaduwa ug mao unta kini makadugang og labad sa ulo ngadto sa mga kaatbang sa UV.

Ang 6-foot-4 ug Hawaiian-born nga si Saycon didto unang nagduwa sa Asian College of Science and Technology (ACSAT) sa Dumaguete City. Ang academic defficiency maoy hinungdan nga dili siya makaduwa atol sa gihimong screening niadtong miaging semana.

Laing dili makaduwa alang sa Lancers mao si Harlow Villanil, kinsa nagpaalim pa sa iyang “acute cruciate ligament” o ACL ug nagpa-rehab karon ubos sa CESAFI physical therapist nga si Dr. Roel Dejaño, kinsa mibutyag nga iya nang gihatagan og go signal pagduwa si Clifford Maguate sa Southwestern University (SWU) Cobras.

Ang Cobras posibleng moabot sa finals karong tuiga human sa ilang hataas nga kasinatian sa CESAFI Partner’s Cup. Nagpabilin sab kanila ang kadaghanan sa ilang mga beteranong players nga hinog na kaayo alang sa sambunot sa mahogany court. Samtang nag-anam ka hanas ang Cobras, nag-anam sab kabata ang University of Cebu (UC) Webmasters nga adunay unom ka rookies ug ingon man ang University of San Jose-Recoletos (USJ-R) Jaguars nga adunay pito ka rookies. Dili ako matingala kun dili sila makaabot sa finals.

Samtang wala pa makasugod, labaw pang wala pa gyud makahunat og maayo ang mga lig-ong teams nga atong gituhoan nga mosulod sa semifinals (UV, SWU, UC ug USJ-R). Dili sab nato mahimong hukman ang katakus sa ubang sakop sa CESAFI nga University of San Carlos, University of Southern Philippines Foundation, Don Bosco Technology Center ug Cebu Institute of Technology.

Sa bisan asang kompetisyon, ang tanang mosalmot aduna gyu’y kahigayonan sa pagdaog apan depende lang usab kana sa pagpangandam sa team.

Apan bisan pa niana, ako gihapong hipanglantawan nga ang UV mao gihapon ang makatag-iya sa korona sa 9th edition sa CESAFI. Mahimong masayop ko, apan hinaut sab nga kining akong panagna maoy mahimong inspirasyon sa ubang teams nga maninguha og maayo aron sila na usab maoy mahimong kampiyon.

* * *

Naghisgot man gyud ta'g CESAFI, ako lang usab lakbitan paghisgot kun unsa ka importante ang usa ka therapist sa basketball court kay sila maoy moatiman dayon sa higayon kun adunay player mapiang.

Tungod aning usa ka matang sa injury nga gitawag og ACL diin magisi ang ligament sa imong tuhod, nagkadaku ang panginahanglan sa usa ka therapist. Bisan asa ning kalibotan pinangita ang mga propesyon sama kang Dr. Dejaño nga giilang “doctors on the bench.”

Atong paninguhaon nga aron gyud masabtan unsa kining therapist, ato kining hisgotan sunod semana.

* * *

Miabot ang panahon nga bisan ang pagpa-ayo sa piang moderno na tungod kay niadtong karaang panahon kun kita mapiang, mahadlok kita mohikap og tubig, apan karon humolan pa gani og ice kay ang manghihilot ra gyud maoy katungod pag-ayo niini. Karon daghan nang matang sa therapy aron dali rang maayo ang piang.   (BANAT NEWS)