Mga tang-an abot sa Ground & Pound V: Retribution

CEBU, Philippines - Usa ka Mixed Martial Arts superfight tali sa usa ka bangiitang Pinoy ug bisitang Malaysian maoy mopainit og maayo sa eksplosibong aksiyon sa gikahinaman nga Ground & Pound V: Retribution - usa ka kickboxing ug MMA showdown nga gikatakda karong Agosto 8 sa alas-7 sa gabii diha sa Cebu Coliseum.

Si Ricardo 'D Hammer' Cubillas sa Butuan Extreme MMA mag-atubang og malisud nga hagit gumikan kay garbo sa nasud maoy iyang panalipdan sa iyang pakighamag ni Samchai Sir-Rencho sa Tenbudo MMA Malaysia sa usa ka tulo ka hugna nga binakbakay ubos sa middleweight (170 lbs.) division.

Sa main event sa MMA, si Ali 'The Grappler' Malawi sa Lapu-Lapu City-based Mixed Fighting System makigharong ni Voltaire 'Rough Neck' Gonzales sa Red Dragon MMA sa Tagbilaran ubos sa pinweight (110 lbs.) class.

Si Renan 'Limbas' Noblefranca sa Yaw-Yan Cebu ArDigma nanghinaut sab nga makahimo og dakung kasikas sa iyang pakigharong ni Jobert 'Da Sniper' Bayling sa Wushu Sanshou sa Cagayan de Oro City sa main event sa kickboxing card.

Ang pinaksitay nilang Noblefranca ug Baylin gihulagway nga gubat tali sa "Pride of the Visayas" batok sa "Best of Mindanao."

Ang mga tiket nagkantidad og P100 sa upper box, P300 sa lower box, P500 sa ringside ug P1,000 sa VIP/Sponsor.

Gipasiugdahan sa Yaw-Yan ArDigma Martial Arts Sports Promotions ubos sa liderato ni Yaw-Yan ArDigma Cebu founder ug Vis-Min director Master Benigno 'Ekin' R. Caniga, Jr., ang huego-todo nga kumbati gipaluyohan sa Tanduay, torturefight.com ug RJS Metal Ads and Prints inabagan sa Cebu City Sports Commission, K-1 Extreme Sportshop, Ironics Internet Cafe, Yaw-Yan ArDigma-Sacramento, USA ug Fahrenheit Design and Solution.   (BANAT NEWS)