Crack Legion kampiyon na

CEBU, Philippines - Nilampos ang Crack Legion sa pagsakmit sa kampiyonato sa Governor Gwen Garcia Airsoft Open niadtong miaging adlaw didto sa Prime Orion Properties sa North Reclamation Area.

Ang Crack Legion nitali og otso puntos atol sa pagtapos sa round 15 human nila gituhog ang duha ka daog batok sa Team Airsoft San Carlos (TASC) ug Hammerhead.

Ang Special Airsoft Action (SAAT) nisakmit sa ikaduha human mikulit og 7.5 points, samtang ang inilog nga Guadalupe Airsoft Team (GAT) napunta sa ikatulong dapit dihang nakakuha sila og daghang yellow card nga maoy nakagamay sa ilang puntos. Ang GAT nitapos sa torneyo nga adunay 7.357 points.

Nipahiluna sa ikaupat ang Toledo Airsoft Group (TAG) sa ilang 4.625 points, samtang ang pambato sa siyudad sa Talisay nga West Rasmusen Team (WRT) maoy mi-okupar sa ikalimang dapit.

Sa laing bahin, si Governor Garcia mipasalamat ngadto sa mga tawo nga niabag aron mamahimong malampuson ang Guv Cup nga nilibot sa tibuok probinsiya sa Sugbu sama sa Moalboal Balamban, San Remigio, Argao ug Mandaue.

"I’m very happy that there is secured support for the years to come. We can expect that this sport will grow even to greater heights," matud pa ni Paolo Garcia, chief operations officer sa Guv Cup.

Nidawat usab og special awards ang ASB Commando isip best military loadout, Extreme Airsoft Enthusiasts (XAGE) nga nidawat sa sportsmanship award, samtang ang Special Airsoft Action Team (SAAT) maoy gipasidunggan isip Best in Close Quarter Battle.

Si Kevin Jubela sa Team Pacman maoy nidaog sa titulo isip   Best in Stealth Operative.    (BANAT NEWS)