Aero Marathon Competition sa Pusok

CEBU, Philippines - Ang Pusok Physical Fitness Club mopasiugda og Aero Marathon Competition karong Sabado diha sa community stage sa Millennium Park sa barangay Pusok, dakbayan sa Lapu-Lapu.

Matud pa ni project coordinator Aster Epe-Omolon nga ang maong torneyo bukas sa tanan nga mahiligon sa paugnat sa kusog ilabi na ang aerobics ug taebo.

Sugdan kini sa alas-8 sa buntag.

Aduna kini registration fee nga P100 nga daku kaayo'g matampo alang sa kalampusan sa maong kalihukan.

Ang mga mananaog sa aeromarathon makadawat og ganting salapi.

Ang usa ka adlaw nga kompetisyon, usa lamang sa mga kalihukan sa 6th anniversary sa Pusok Physical Fitness Club (PPFC).

Ang PPFC mopahigayon og usa ka oras nga ehersisyo matag adlaw gikan sa alas-5 hangtod sa alas-6 sa buntag diha sa Millennium Park ilawom sa Marcelo Fernan Bridge ug bukas kini sa publiko.

Usa kini sa programa sa paugnat sa kusog ni barangay Pusok ubos sa liderato ni Brgy. Capt. Boy Omolon.

Alang sa dugang mga kasayoran, mahimong motawag ni project coordinator Aster Epe-Omolon o dili ba ni Hermes Lutao sa 340-7772. – BANAT NEWS