Cebu bag-ong 'record holder' sa Guinness World of Record

CEBU, Philippines – Gikompirmar na nga ang siyudad sa Sugbu maoy bag-ong Guinness World Record holder isip World’s Largest Dance Class human milampos pagguba sa karaang rekord nga gihuptan sa Hungary niadtong Hunyo 27 didto sa Cebu City Sports Center (CCSC) oval.

Si Kaoru Ishikawa, manager sa Guinness World Record nagkanayon nga milampos ang Sugbu sa pagsakmit sa titulo human makapasayaw og 7,770 dancers kumpara sa 2,289 ka dancers sa Hungary.

Ang maong record attempt gilangkuban sa mga tinun-an sa high school gikan sa nagkalain-laing pampublikong tunghaan dinhi sa Sugbu nga mipasundayag og upat ka matang sa sayaw sulod sa 10 minutos. 

Hinuon, wala gigarantiya sa Guiness World Record nga malakip na sa sunod edisyon ang Sugbu, apan gikonsidirar nila ang tanang bag-ong rekord lakip na ang Largest Dance Class sa Cebu nga

mogawas sa mga mosunod nga publication ug produkto sa Guinnes Book of World Records.

Nagmaya usab ang Cebu City Dance Sport Team nga gipangulohan ni Edward Hayco, kinsa nagpasalamat sa tanang misuporta ug nitabang aron molampos sila sa ilang tahas nga mapatik sa kasaysayan isip Dance Sport Capital of the Philippines.

Lakip sa mga mihatag og suporta mao ang Cebu City government ubos sa liderato ni Mayor Tomas R. Osmeña, DepEd, Cebu City Sports Commission ug M.Lhullier Kwarta Padala. – BANAT NEWS