Calinawan nanghawod sa Alegre leg

CEBU, Philippines – Malaumon ang Sugbuanong si Gerrie Calinawan nga mabalik sa national team dihang iyang gidominar ang second leg sa National Age-Group Triathlon Series niadtong miaging adlaw didto sa Alegre Beach Resort, Sogod, Cebu.

Gipilde ni Calinawan ang kanhi top junior swimmer nga si Ralph Francistino Arche aron masakmit ang titulo sa 25-29 years old class, samtang si Franz Baguio mipahiluna sa ikatulong dapit.

Si Calinawan mi-okupar sa ikatulong dapit sa swim event, sunod ni Mark Weis sa Hong Kong, apan namawi ang Sugbuanon sa bike event. Gikan didto wala na lingia ni Calinawan ang nabiyaan niyang mga kaatbang aron maangkon ang titulo.

Sa overall standings, si Calinawan mitapos sa lumba sulod sa usa ka oras ug unom ka segundos, samtang si Arche mi-oras og 1:45:08 alang sa second place ug si Weis mi-okupar sa ikatulo human niya gitapos ang lumba sulod sa usa oras ug 50 minutos.

Hinuon, si Weis nakabawi dihang iyang giharos ang 35-29 age class, gisundan nilang Trino Transmonte ug Warren Troy Vergara alang sa ikaduha ug ikatulo nga dapit.

Si Lhoriz Echavez maoy nanghawod sa women’s class human siya nahimong fifth placer sa swim event, sixth placer sa bike event ug eight placer sa running. Gitapos niya ang lumba sulod sa usa ka oras, 59 minutos ug tres segundos.

Nisakmit usab og titulo si Fajardo Pepito sa 20-24 age class ug si Vic Suarez maoy hari sa 45-49 division.

Sa 30-34 class, si Anthony Regis maoy nidaog uban nila ni Troy Avergonzado ug Romwell Roque. Si Alan Panal maoy nanghawod sa 40-44 category, samtang si Gerard Malixi maoy mipahiluna sa ikaduha.

Napuhalan usab ni Jose Ricardo Dizon si Danao City councilor Boying Rodriguez alang sa titulo sa 50-54 class. – BANAT NEWS