Governor Garcia Airsoft Open championship andam na

CEBU, Philippines – Andam na ang tanan alang sa championship leg sa 1st Governor Gwen Garcia Airsoft Open Championship nga gikatakda karong Hulyo 25-26 diha sa Prime Orion Properties, kilid sa Cebu Doctors' University (CDU) sa dakbayan sa Mandaue.

Si Paulo Garcia, ang chief executive for operations sa maong kalihukan mibutyag kagahapon atol sa press conference diha sa Cebu Provincial Capitol Session Hall nga ang iyang inahan nga si Governor Gwen Garcia mosakay og simba (armored personnel carrier) ug V-150 nga modala kaniya ngadto sa 30-feet tower.

Mapasigarbuhong gipahibalo ni Garcia nga ang GUV Cup Airsoft Open maoy labing daku nga event sa nasud in terms of regularity ug attendance.

“The players are not aiming for the prize but for honor and prestige. We are just here to play and to have fun and at the same time, we are all working together to make Cebu as the airsoft capital of the Philippines,” matud ni Garcia.

Kahinumduman, ang airsoft gisugdan dinhi sa Sugbu sa dekada 80 uban ni GUV Cup Airsoft Open chairman Deo Cerna isip usa sa mga pioneering players. Ning bag-o, aduna nay 6,000 ka airsoft players sa probinsiya.

Ang duha ka adlaw nga gubat naglatid og 16 ka teams nga naapil gikan sa nangaging lima ka legs nga gipahigayon diha sa Mandaue, Moalboal, Balamban, San Remigio ug Argao.

Kini naglakip sa Guadalupe Airsoft Team (GAT), Mandaue Airsoft Group (MAG), Crack Legion, Special Airsoft Action Team (SAAT), Hammerhead, Philippine Airsoft Club of Mactan (PACMAN), Globus-Petron Alliance, Southern Cebu Airsoft Recon (SCAR), Toledo Airsoft Group (TAG), Extreme Airsoft Games Enthusiast (X-Age), Bogo Team Cobra (BTC), Tango Down, Badian Airsoft Team (BAT), West Rasmussen Team (WRT), Alex Binghay Commando (ASB Commando) ug ang Team Airsoft San Carlos (TASC) sa Negros Occidental.

Ang maong kompetisyon nga gipasiugdahan sa Cebu Provincial Government ubos sa liderato ni Governor Gwen Garcia gipaluyohan sa QBC Sporting Supply, San Miguel Inc, ABN Dream Works, Sulpicio Lines, VECO, Habagat Outdoor Equipment, Pacific Audio Video Inc., Justins Hobby Depot, Audio One, Pyroworks, GGC Service Inc., Sheen Trade, RC Ramos Construction, Cebu RC Heli Club, ug sa JCI-Metro Cebu. – BANAT NEWS