2 taga-Cebu nakapasar sa FIFA referees course

CEBU, Philippines – Upat lang sa 30 ka referees ang nakapasar sa FIFA National Referees Course nga dinhi gipahigayon sa Sugbu dili pa dugay.

Sa upat, duha niini mga Sugbuanon.

Ang beteranong si Randy Estremos ug ang batan-ong si Wilford Sabella nakig-uban nilang Oliver Moreno ug Grant Rojas sa Negros Oriental Football Association (NORFA) isip bag-ong FIFA referees.

Si Estremos maoy labing impresibo sa tanang nakapasar. Ang 42-anyos nga si Estremos maoy mipatigbabaw batok sa mga batan-ong referees atol sa international standard fitness test.

Sa iyang bahin, si Sabella mipalta og pipila ka session aron atimanon ang iyang masakiton nga inahan, apan nakalusot gihapon tungod sa iyang exemplary performance.

Ang 22-anyos nga si Sabella, kinsa usa ka varsity player sa University of Southern Philippines (USPF), wala magtuo nga makapasar tungod sa mga kakulian.

Usa pa lang ka tuig nga naka-officiate si Sabella, apan nakakuha og national-level rating human nakapasar sa acceleration course didto sa Malaysia.

Nasayran, si Estremos gihatagan na og alibyo nga mo-officiate sa U-19 International Tournament didto sa Vietnam sunod bulan. – BANAT NEWS