Cobras midaog batok Webmasters

CEBU, Philippines – Mipakita na sab sa ilang kabangis ang Southwestern University (SWU) pinaagi sa pagpukan sa University of Cebu (UC) Webmasters, 91-80 atol sa ilang exhibition game nga giulohan og “Match of the Titans” sa miaging gabii diha sa Cebu Coliseum.

Sa sayo pa, ang UC College of Law cagers mibuntog sa SWU College of Law quintet sa iskor nga 85-77.

Samtang nagpakita gihapon ang Cobras sa ilang katakus aron ilhon nga legitimate title contender, gipruyba sab sa Webmasters nga aduna sila’y abilidad dihang ilang gipapas ang 12 puntos nga alkanse, 71-83 aron pagkitkit sa labaw ngadto na lang sa single digit, 80-85 pinaagi sa sunod-sunod nga triples ni Moncrief Rogado ug Janssen Abella sa katapusang 17.2 segundos sa duwa.

Gidebuynas og maayo si Eliud Poligrates ug nagtusak-tusak ang iyang mga outside shootings aron pangulohan ang kadaugan sa SWU pinaagi sa iyang 45 puntos.

Si Rogado mao sab ang nangulo sa pilderong Webmasters sa iyang 17 puntos, samtang ang 6-foot-9 nga si June Mar Fajardo wala kaayo mopakita sa iyang naandan nga duwa ug igo lang mipupo og 10 puntos uban ni Kelvin Juliane ug Kevin Quilantang.

Sa sayo pa, sila si Vince Albeos ug ang kanhi UC captain ball nga si Kenneth Kern Sesante maoy nangu sa UC College of Law nga nagkumboya og 39 puntos.

Puntos Matag Usa

SWU (91) - Poligrates 45, Pacquaio 10, Gallarde 10, Armecin 8, Diango 6, Pria 6, Ortuyo 3, Jalandoni 2, Caytona 2

UC (80) - Rogado 17, Fajardo 10, Juliane 10, Quilantang 10, Abella 7, Mohammad 5, Tano 5, Luceño 5, Bernil 4, Cayanong 2, Capoy 2 – BANAT NEWS