3 pointer ni Navasca nakaluwas sa Ranudo A
CEBU, Philippines – Kalmado kaayo si Arvin Navasca nga mipasulod sa iyang three-point shot sa nahabiling dos segundos sa overtime aron luwason ang Ranudo A batok sa Sta. Teresita A sa iskor nga 91-88, sa 2009 Jun Pe Fiesta Cup diha sa Benjamin Solon Memorial Gym, barangay Cogon-Ramos, ning siyudad.
Sila si Navasca ug Mark Galo mibugha og 32 puntos matag usa aron pangulohan ang Ranudo A, kinsa nilabaw og dos puntos sa halftime, 43-41.
Si George Sambulan, miposa og 31 puntos aron pangulohan ang pilderong Sta. Teresita A, samtang si Mark Tecson mihipos og 14 puntos.
Sila si Sambolan ug Tecson maoy nangulo sa 15-7 run nga gipatuman sa Sta. Teresita, samtang ang duha ka free throws ni Sander Hera maoy mihatod sa duwa ngadto sa overtime human magtabla ang iskor, 78-all.
Sa dugang singko minutos, sikit na kaayo ang kumbati, apan si Navasca maoy nakaluwas sa Ranudo A human mapasud ang iyang three pointer sa himalatyong oras.
Puntos Matag Usa
Ranudo A (91) - Navasca 32, Galo 32, Rivera 7, Cartagena 4, Arbol 4, Occo 4, Florentino 2, Manzano 2
Sta. Teresita A (88) - Sambulan 31, M. Tecson 14, Gunido 12, S. Hera 11, Kyamko 8, J. Tecson 4, P. Hera 4, A. Mendoza 4 – BANAT NEWS
- Latest
- Trending
