CEBU, Philippines – Ang final leg sa 1st Governor Gwen Garcia Airsoft Competition himuon karong Hulyo 25-26 diha sa Prime Orion Properties kilid sa Cebu Doctor's University sa dakbayan sa Mandaue.
Ang duha ka adlaw nga gubat apilan sa 16 ka teams nga nakalusot gikan sa miaging lima ka legs nga gipahigayon diha sa Mandaue, Moalboal, Balamban, San Remigio ug Argao.
Tungod sa pagpanghawod sa tulo sa lima ka legs, ang Guadalupe Airsoft Team (GAT) maoy humot nga makakuha sa overall title, hinuon ang ubang qualifiers may purohan sab nga modaog.
Mokompleto sa mga partisipanteng koponan mao ang Mandaue Airsoft Group (MAG), Crack Legion, Special Airsoft Action Team (SAAT), Hammerhead, Philippine Airsoft Club of Mactan (PACMAN), Globus-Petron Alliance, Southern Cebu Airsoft Recon (SCAR), Toledo Airsoft Group (TAG), Extreme Airsoft Games Enthusiast (X-Age), Bogo Team Cobra (BTC), Tango Down, Badian Airsoft Team (BAT), West Rasmussen Team (WRT), Alex Binghay Commando (ASB Commando) ug ang Team Airsoft San Carlos (TASC) sa Negros Occidental.
Adunay press conference kabahin sa maong kalihukan karong Hulyo 18 sa alas-10:30 sa buntag diha sa karaang session hall sa Cebu Provincial Capitol. – BANAT NEWS