Laing lumba sa dagan ipahigayon ning bulana

CEBU, Philippines – Human sa malampusong Cebu leg sa 33rd National Milo Marathon, lain pang tulo ka mga kalihukan sa lumba sa dagan ang mahitabo ning bulana uban ang July edition sa Run For Sight Monthly Series diha sa Cebu Doctors' University sa Mandaue City.

Ang Run For Sight Monthly Series nisikad niadtong miaging bulan nga naghatag og kahigayonan sa mga local runners ilabi sa mga bag-ong tubo sa pagbaid sa ilang abilidad.

Karong Hulyo 19, duha sa susamang kalihukan ang ipahigayon ug kini mao ang labing unang Move With A.I.R. nga gipasiugdahan sa St. Theresa's College (STC) ug ang opening leg sa MetroSports Running Series.

Ang Move With A.I.R. Run kabahin sa homecoming activities sa STC, samtang ang MetroSports maoy sinugdanan sa senemanang dagan sa ilang mga miyembro ug guests. – BANAT NEWS