Mandaue Jaycees-B naka-una

CEBU, Philippines – Nakauna ang Mandaue Jaycees-B ni Joey Cal human ilang gipilde ang Rich Media ni Richard Mercado, 71-63 sa Game-1 sa ilang best-of-three series sa Jaycees Basketball Association (JBA) 2009 First Conference Finals didto sa Benedicto College gym sa Mandaue City.

Mahimo nang sakmiton sa Mandaue-B ang korona kun modaog gihapon sila sa Game-2 karong adlawa.

Sa sayo pa, ang ilang sister team nga Mandaue Jaycees-A maoy misakmit sa ikatulong dapit human nila gilubong ang Uptown Jaycees ni Dr. Boy Te sa iskor nga 92-76. Ang kumbati nahimong usa ka record game tungod kay si Edgar Colina sa Mandaue-A nagpauwan og 10 ka three-point shots sa iyang 35 puntos aron pangulohan ang iyang koponan.

Ang Mandaue-B migamit og man-to-man defense aron pugngan ang Rich Media ngadto lang sa nuybe puntos sa tibuok fourth period.

Ang kanhi FEU Tamaraw point guard nga si Paul Alelu Flores mi-iskor og 25 puntos alang sa Mandaue-B, samtang si Army Marata mitampo og 14 puntos.

Si Beboy Potencioso miposte og 24 puntos aron pangulohan ang Rich Media.

Sa laing duwa, si Colina miburak og 35 puntos aron pangulohan ang Mandaue-A. Ang kanhi USC Warrior nga si Nestor Patindol midugang og 17 puntos, samtang sila si Luther Magallano, Genghis Khan Ylaya ug Joshua Lerio miamot og 10 puntos matag usa.

Si Peter Sta. Maria ug si   Franco Te nagkumboya og 23 puntos alang sa Uptown Jaycees.

Puntos Matag Usa

Unang duwa:

(for 3rd place)

Mandaue-A (92) -Colina 35, Patindol 17, Magallano 10, Ylaya 10, Lerio 10, E. Latonio 8, R. Latonio 2

Uptown Jaycees (76) - B. Te 20, Sausa 20, P. Sta. Maria 12, F. Te 11, C. Sta. Maria 6, R. Lim 5, Noel 2

Ikaduhang duwa:

(championship)

Mandaue-B (71) - Flores 25, Marata 14, J. Acebron 7, D. Acebron 6, R. Garcia 5, Toledo 4, Cal 3, Balbuena 3, Coros 3, P. Garcia 2, Cortes 2

Rich Media (63) - Potencioso 24, Estella 11, Basanes 8, Lo 7, Huang 5, Mercado 3, Odulio 2, Ting 2, Sy 1 – BANAT NEWS