STAA Run nahikay na
CEBU, Philippines – Nahikay na ang tanan alang sa St. Theresa's College Alumnae Association (STAA) Move with Air Run nga mosikad karong Hulyo 19 diha sa STC grounds sa General Maxilom Avenue.
Gipaabot nga moabot sa 1,000 runners gikan sa nagkalain-laing running clubs, eskuylahan, korporasyon ug sa mga pundok sa militar ang moapil sa ginukdanay sa kadalanan.
Ang lumba nga gipresentar sa Smart Communications uban sa Oakley ug sa Probinsiya sa Sugbu, adunay duha ka kategoriya -- 5K open ug 3K open uban ang STC students/alumnae category.
May lumba sab sa 3K kiddie open category ug 5K executive division.
Molamas sa kalihukan mao ang kinaugalingon nga STC kiddie run nga gibahin sa tulo ka age brackets, 5-7 anyos, 8-10 anyos ug 11-13 anyos nga anha lang himoa sud sa STC campus.
Gawas sa mga tropeyo, ang makampiyon sa 5K open (male ug female) mobulsa og P3,000 matag usa, ang second placers makadawat og P2,000 ug ang third placers makaangkon og P1,000. Ang motapos gikan sa ikaupat hangtod sa ikanapu nga dapit makadawat og P300 ug medalya.
Ang mga kampiyon sa 3K open mobulsa og P2,000 matag usa, ang second placers makaangkon og P1,000 ug ang third placers makadawat og P500. Makadawat sab sila og mga tropeyo.
Ang fourth hangtod sa 10th placers makadawat og P200 ug medalya.
Gisugdan na ang registration diha sa PSC office sa Cebu City Sports Center (CCSC), Yayoy's Grill and Resto Bar, STAA office sa St. Theresa's College, Athlete's Foot sa Ayala Center-Cebu ug sa Casa Ilongga sa Robinson Place. – BANAT NEWS
- Latest
- Trending
