Mandaue Jaycees-A abante sa JBA semifinal

CEBU, Philippines – Mi-abante na ngadto sa semifinals ang Mandaue Jaycees-Team A nga gipangulohan ni Ed Latonio human ilang gilubong ang Zone 360 ni Janjan Boniel, 81-60 sa tinaktakay nga duwa sa Jaycees Basketball Association (JBA) 2009 First Conference didto sa Benedicto College gym, Mandaue City.

Ang Mandaue-A squad sayo kaayong nanginit ubos sa pagkumboya nilang ex-USC Warrior Nestor Patindol ug Ed Latonio aron pagkuha’g 26-14 nga labaw sa first quarter. Nagpadayon ang ilang kainit dihang mipakanaog sila'g 19-9 run sa second quarter aron inaton ang ilang labaw ngadto sa 22 puntos, 45-23 sa halftime.

Ang Zone 360 misuway   pagsikit pinaagi sa 21-15 run sa third period, apan igo lang silang nakapaduol ngadto sa 10 puntos, 44-54 kay ang Mandaue-A mipatuman og 27-16 nga rally aron inaton og balik ang labaw.
Lima ka players sa Mandaue-A ang mi-iskor og double figures nga gipangulohan nilang Colina ug Patindol kinsa parehong mihipos og 14 puntos. Si Ed Latonio midugang og 12 puntos.

Si Niño Boniel maoy topscorer sa Zone 360 pinaagi sa iyang 14 puntos, gisundan ni Jayo Borromeo nga adunay 12 puntos.

Puntos Matag Usa

Mandaue-A (81) - Colina 14, Patindol 14, E. Latonio 12, Lerio 11, Ylaya 10, R. Latonio 6, Magallano 4, ong 4, Gamallo 4, Cenabre 2

Zone 360 (60) - N. Boniel 14, Borromeo 12, Trespicio 10, Alejandrino 10, J. Boniel 10, Go 4 – BANAT NEWS