SCSIT, Mother Therese nakakuha'g luna sa final

CEBU, Philippines – Ang Salazar Colleges of Science and Institute of Technology (SCSIT) ug ang Talisay-based Mother Therese squad miangkon og luna sa 2009 Vice Mayor Michael Rama Cup Softball Tournament didto sa barangay Labangon, ning siyudad.

Ang SCSIT nagpaabot na lang alang sa ilang kaatbang sa kampiyonato sa senior A ug ingon man ang Mother Therese sa senior B category.

Miabante ang SCSIT sa final human miposte og 3-0 nga kadaugan batok sa Team Locans.

Hinuon, ang Locans may purohan pa nga moabante sa final sa higayon nga ilang mapilde ang modaog sa Duraben-Energo showdown.

Sa laing bahin, ang Mother Therese mipukan sa Paknaan, 5-4 aron pag-angkon sa unang luna sa final sa senior B.

Ang Paknaan posibleng maoy makaangkon og katungod sa pakigsangka sa Mother Therese sa kampiyonato kun ilang mapilde ang modaog sa Pelaire-Jagobiao showdown. – BANAT NEWS