Rich Media mikulit daog sa JBA caging

CEBU, Philippines – Mikulit sa ilang ikalimang daog ang Rich Media ni Richard Mercado pinaagi sa pagbuntog sa Uptown Jaycees Foundation, 79-68 sa Jaycees Basketball Association (JBA) 2009 First Conference didto sa USPF gym sa barangay Lahug.

Ang Rich Media sa pakigtambayayong sa Sherilin Plastic ni Jeremy Huang, mipahungaw sa ilang kainit sa second period ug mipatuman og hugot nga depensa aron pagposte og 39-26 nga labaw sa halftime. Padayon miatake ang Rich Media sa third quarter aron inaton ang labaw ngadto sa 15 puntos, 54-39 nga labaw sa katapusang 10 minutos sa duwa.

Si ex-CIT Wildcat   Jazon Jae Estella maoy nangulo sa Rich Media pinaagi sa iyang 18 puntos, gisundan ni Glen Besanes nga adunay 12 puntos, samtang sila si Beboy Potencioso ug Huang miamot og 11 puntos matag usa.

Ang Uptown Jaycees gipangulohan ni Jimbo Noel, kinsa mi-iskor og 16 puntos, si Dindo Sausa midugang og 15 puntos ug sila si Chris Sta. Maria ug Franco Te nagkumboya og 24 puntos.

Sa laing duwa, ang Mandaue Jaycees-Team B midaog batok sa undermanned Mandaue Jaycees-Team A sa iskor nga 87-76.

Si Paul Alelu Flores maoy nangulo sa Mandaue-Team B, samtang si Jerome Acebron milansang og 24 puntos.

Sila si Joshua Lerio ug Edgar Colina nga parehong mibugha og 16 puntos mao sab ang nangulo sa pilderong Mandaue-A.

Puntos Matag Usa

Unang duwa:

Rich Media (79) - Estella 18, Besanes 12, Potencioso 11, Huang 11, Ting 9, Odulio 6, Mercado 5, Lo 4, Que 3

Uptown Jaycees (68) - Noel 16, Sausa 15, C. Sta. Maria 13, F. Te 11, B. Te 4, Jayme 3, Purcia 3, P. Sta. Maria 3

Ikaduhang duwa:

Mandaue-B (87) - Flores 26, J. Acebron 24, D. Acebron 17, P. Garcia 6, R. Garcia 6, Toledo 4, Cortes 4

Mandaue-A (76) - Lerio 16, Colina 16, Camallo 13, Latonio 13, Ylaya 8, Cenabre 8, Magallano 2 – Gabby G. Malagar (BANAT NEWS)