Arum supak sa plano ni Roach

CEBU, Philippines – Gisupak ni Top Rank Inc. big boss Bob Arum ang gusto ni coach Freddie Roach nga monaog pa si Miguel Cotto sa 143 lbs. aron sangkaon si world pound-for-pound king Manny Pacquiao karong Nobiyembre 14 didto sa Las Vegas, Nevada.Matud pa ni Arum nga imposible ang gustong mahitabo ni Roach tungod kay ang nutritionist ni Cotto daan na nga namahayag nga kutob lang 144 o 145 lbs. ang ambakan ni WBO welterweight champion. Ang pagnaug ni Cotto sa mas ubos pa nga timbang magmugna og kadaot sa lawas niini.

Nagkanayon usab si Arum nga nahuman na ang ilang sabot-sabot tali sa kampo sa Puerto Rican nga gipangulohan ni Gabriel Penagaricano, kinsa maoy legal counsel ni Cotto.

Sunod nga pakigsabotan ni Arum mao ang kampo ni Pacquiao nga gipangulohan sa Canadian adviser niining si Michael Koncz. Sila si Arum ug Koncz motuyo sa pag-anhi sa Pilipinas sunod semana aron ilang ipakita ni Pacquiao ang fight proposal.

Nagtuo si Arum nga mopirma si Pacquiao sa maong kontrata uban sa abogado niining si Franklin Gacal aron maluto na ang away karong Nobiyembre.

Sa iyang bahin, si Roach nagkanayon nga bisan pa man og naglisod si Cotto sa katapusan niyang sangka batok ni Joshua Clottey, usa gihapon siya ka delikadong boksidor. – Lemuel P. Maglinte (BANAT NEWS)